چیاکورد: مادەم دبێژن، “ھەسەدە ھەڤالبەندا مە یە” بلا رێڤەبەریا خوەسەر ب فەرمی ناس بکەن!

چیاکورد: مادەم دبێژن،"ھەسەدە ھەڤالبەندا مە یە" بلا رێڤەبەریا خوەسەر ب فەرمی ناس بکەن!

جیگرێ ھەڤسەرۆکاتیا مەجلسا رێڤەبەر یا رێڤەبەریا خوەسەرا ل رۆژئاڤایێ کوردستانێ بەدران چیاکورد، بال کێشا سەر راپۆرتا پارلامەنتۆیا یەکیتیا ئەورۆپایێ و گۆت، گەر دبێژن ھەسەدە ھەڤالبەندا مەیە، دڤێت دەستکەفتییێن ل گەل ھەڤپەیمانیا ناڤدەولەتی بێنە مایندەکرن و رێڤەبەریا خوەسەر ب فەرمی ناس بکەن.

چیاکورد راپۆرتا پارلامەنتۆیا ئەورۆپایێ یا چەند رۆژ بەرێ ل سەر شەرێ 10 سالان یێ سووریێ بەلاڤ کریە و تێدا گۆتیە، “ھەسەدە ھەڤالبەندا مە یە” گۆت: “ھەڤپەیمانیا ناڤدەولەتی یا کو ژ 79 دەولەتان پێک دهێت، ھێزێن سووریا دەمۆکراتیک ھەڤبەند و ھەڤکار دبینیت، ل سەر ڤێ یەکێ دڤێت دەستکەفتیێن ھەیی بێنە مایندەکرن، پەژراندنەکا سیاسی چێببیت و رێڤەبەریا خوەسەر ب فەرمی بهێتە ناسکرن.”

بەدران چیاکورد دا زانین کو حەتا بەشەکێ سووریێ ل ژێر کۆنترۆلا داگیرکەران دا بیت، چارەیا سیاسی پێک ناهێت و دیار کر: “ئەگەر حەزەکا ناڤدەولەتی دەرکەڤیتە ھۆلێ و ژ بۆ چارەسەریێ بریارا داوی ئانینا ل داگیرکەریێ بدەت، ئەم باوەرن دێ ب داوی بیت.”

ھەروھا بەدران چیاکورد دایە خویاکرن کو ترکیا نە ب نییەتە چ گاڤان ب پاش دا باڤێژیتە و ژ سووریێ دەرکەڤیت، هێژ زێدەتر ھەول ددەت کو ل ھەر دەڤەرەکا داگیرکری، ھەبوونا خوە ماییندە بکەت، میناکا ڤێ ژی، ئاڤاکرنا بارەگەھ و جھێن کۆنترۆلێ یێن ل سەرێ کانی و گرێ سپی و خەتا عەین عیسایێ یە.