ئاپۆ «مرتاح» ل ئیمرالیێ پالدایه‌ و په‌كه‌كه‌ خه‌لكی بۆ وی برسی دكه‌ت

ئاپۆ «مرتاح» ل ئیمرالیێ پالدایه‌ و په‌كه‌كه‌ خه‌لكی بۆ وی برسی دكه‌ت

رێخستنا په‌كه‌كێ ده‌م بۆ ده‌مێ گره‌ڤا برچیبوونێ یا ب زوور ب گرتیێن سیاسی و په‌نابه‌رێن كه‌مپا مه‌خموورێ ژ بۆ عه‌بدوللا ئۆجالان دكه‌ت و دبێژیت: «ژ بۆ ئازادییا فیزیكی یا رێبه‌ر ئاپۆ ئه‌ڤ شێنی د گره‌ڤێ ده‌ نه‌ و ل به‌ر خوه‌ ددن»، لێ یا راست ئه‌ڤ 22 ساله‌ ئاپۆ د ئیمرالیێ دا‌ رازایه‌ و رۆژه‌كا ب ته‌نێ ژی نه‌ گره‌ڤ ژ بۆی ئازادییا خوه‌ گرتییە و نه‌ ژی چ جوره‌ به‌رخوه‌دانه‌ك ‌كرییه‌.

رێخستنا په‌كه‌كێ ل مژدارا سالا رابووری 2020ێ، چالاكییه‌ك ب ناڤێ گره‌ڤا برچیبوونێ ل سه‌ر گرتیێن سیاسی یێن په‌كه‌كێ د گرتیگه‌هێن تركیێ وباكورێ كوردستانێ فه‌رز كر، پشتره‌ ل كانوونا 2020ێ، ل وارگه‌هێ په‌نابه‌ران یا مه‌خموورێ گره‌ڤ ب گه‌نج، كه‌چ، ژن و كاله‌ مێر و ژنان دا ده‌ست پێ كرن، ئیرۆ 121 رۆژ ل سه‌ر گره‌ڤا گرتیێن سیاسی و 100 رۆژ ل سه‌ر گره‌ڤا مه‌خموورێ ده‌رباس دبن و په‌كه‌كه‌ دبێژیت‌: «ئه‌ڤ گره‌ڤ ژ بۆ شكاندنا ته‌جریدێ و ئازادییا فیزیكی یا رێبه‌رێ ئاپۆیه‌ تێ كرن».

عه‌بدوللا ئۆجالان ل شوباتا 1999ێ ل نه‌یرۆبی یا پایته‌ختا كینیایێ هات ده‌سته‌سه‌ر كرن، ئاپۆ هێژان د باله‌فرێ دا‌ و ل ده‌قیقا یه‌كه‌م ته‌سلیم بوو، چ به‌رخوه‌دانەک نه‌كر و ژ ئه‌فسه‌رێن هێزا تایبه‌ت را گۆت: «هه‌گه‌ر تشته‌ك بكه‌ڤه‌ سه‌ر ملێ من ئه‌ز ئاماده‌مه‌ خزمه‌تێ بكم».

پاش ڤه‌گه‌رینا ئۆجالان ژ بۆی تركیێ، ئه‌و ل ئیمرالیێ هات زیندان كرن، ل مه‌حكه‌مێ هه‌ر كه‌س دزانیت عه‌بدوللا ئۆجالان چ روو ره‌شییه‌ك ژ بۆ خوه‌ تۆمار كر وه‌ختا داخوازا عه‌فوویێ ژ دایكێن عه‌سكه‌رێن ترك كری، ئه‌و عه‌سكه‌رێن ب ده‌ستێ گه‌ریلایان هاتینه‌ قه‌تل كرن، پشترا ژ دادوه‌ر را‌ گۆت: «دایكا من تركه‌، ئەز ژ ترکیێ رە حەز دکم و هه‌گه‌ر ده‌رفه‌ت ب من وه‌ره‌ دایین، ئه‌ز ئاماده‌مه‌ خزمه‌تا تركیێ بكم».

ل سه‌ر ڤی هه‌لوه‌ستا ئۆجالان، مه‌حكه‌ما تركیێ عه‌بدوللا ئۆجالان بدارڤه‌نه‌كر، لێ به‌لێ ئه‌و ل گزیرتا ئیمرالیێ هشت و ل وێرێ هه‌یا رۆژا مه‌ یا ئیرۆ رۆژه‌كا ب ته‌نێ ژی گره‌ڤا برچیبوونێ ژ بۆی ئازادییا خوه‌ نه‌كرییه‌، رۆژه‌كا ب ته‌نێ ژی ل به‌ر خوه‌ نه‌دایه‌، ژ به‌ر كو ئیمرالی ژ بۆی ئاپۆ مینا ئۆتێله‌كا 5 ستێره‌، ئه‌و ب رحەتی ل وێرێ رازایه‌ و رێخستنا په‌كه‌كێ ژ وێ ده‌مێ ڤه‌ هه‌یا رۆژا مه‌ یا ئیرۆ گه‌لێ هه‌ژار د خاپینیت‌ و ته‌نێ ژ بۆی پرۆپاگاندایێ چالاكیێن گره‌ڤا برچیبوونێ ب ئالیگرێن پەکەکێ ددەته‌ ئه‌نجام دان، ئەڤ یەک د دەمەکی دا یە کو چ جاران ئاپۆ ب خوە گرەڤ ژ خوارنێ نەکرییە و وەک گه‌شتیاره‌كێ هێژا د گزیرتا ئیمرالیێ دا ژیان دکەت.

هه‌گه‌ر مرۆڤ ب لۆژیك ل ڤان چالاكیێن گره‌ڤێ یێن رێخستنا په‌كه‌كێ بنێریت‌ دێ ب زه‌لال خوه‌یا بیت كو هه‌م رێخستنا په‌كه‌كێ هه‌م ئاپۆ یێ خه‌لكی د خاپینن، ژ به‌ر كو نه‌مومكینه‌ مرۆڤ 100 رۆژان خوارنێ نه‌خۆت و د ژیانێ دا‌ بمینیت‌ و نه‌ژی ئاپۆ رۆژه‌كێ ل به‌ر خوه‌ دایه‌ كو مرۆڤ ببێژیت‌ ئه‌ڤ زه‌لام هێژایی گره‌ڤ گرتنێ یه‌، لێ به‌لێ ب عه‌كس ئه‌ڤ چالاكیێن په‌كه‌كێ له‌یستۆكه‌كه‌‌ و چ واتایه‌كا‌ دی ژ بۆی نینه‌، ژ به‌ر كو نه‌ ئاپۆ ل ژێر ته‌جریدێ یه‌ و نه‌ژی گرتیێن سیاسی و په‌نابه‌رێن مه‌خموورێ ژ بۆ وی زلامی د گره‌ڤا راستین دا نه‌.