ھەڤپەیمانییا ناڤدەولەتی: هاریكارییا پێشمەرگەی دێ به‌رده‌وام بیت

ھەڤپەیمانییا ناڤدەولەتی: ب کێفخوەشی ئەم هاریكارییا پێشمەرگەیان به‌رده‌وام دكه‌ین

فەرماندارێ ناڤەندا ھەماھەنگییا ھەڤپەیمانییا ناڤدەولەتییا دژی داعشێ راگه‌هاند، ئه‌و ل گەل ھەڤپەیمانێن خوە، ژ بۆ مۆدەرێنکرنا هێزا پێشمەرگە كار دكه‌ن، ژ سالا 2016ێ ھەتا نھا، ب نێزیکی ملیار دۆلاران هاریكارییا پێشمەرگەی ھاتییە کرن و ئه‌ڤ هاریكاری ژی دێ به‌رده‌وام بن.

داڤید ولامس ئیرۆ ژ كه‌نالا كوردستان 24ێ را ئاخڤی و گۆت: 26 پاکێتێن جودا ھەنە کو ئه‌مەریکا، بریتانییا، ئه‌لمانیا و ھۆلاندا ل سەر كار دكه‌ن و ل ھندەک پاکێتان پێشڤەچوونەکا گەلەک باش پێک ھاتییە، لێ ژ بۆ یەکبوونا تەمامییا ھێزێن پێشمەرگە، داخواز و بریارەکا سیاسی یا ئێكلاكه‌ر پێویستە.

ولامس ل سەر ڤێ مژارێ گۆت: ئەز کێفخوەشم و جھێ شانازیێ یە کو ئەز ل ڤێرێ دگه‌ل پێشمەرگەی كار دكه‌م، هاریكاریێن ژ بۆ ھێزێن پێشمەرگەیێ کوردستانێ ژی دێ به‌رده‌وام بن، هاریكاریێن وه‌ك خوراک، سۆتەمەنی، فیشەک، چەک و تشتێن دی ل خوە دگرن، ھەروه‌ھا ئەم د چارچۆڤەیا هاریكارییان دا مەھانە 20 ملیۆن دۆلاران هاریكارییا پێشمەرگەی دكه‌ین.

ھەروھا ولامس دەست نیشان کر: ئەم ل گەل ھەڤپەیمانێن خوە، ژ بۆ مۆدەرێنکرنا پێشمەرگەی كار دكه‌ین، ژ سالا 2016ێ، مە نێزیکی ملیارەک دۆلار هاریكارییا پێشمەرگەی کرییە، بەشەکێ مەزنێ وێ هاریكاریێ، وەک هاریكارییا دارایی بوو، لێ چەک، سۆتەمەنی، تشتێن دی ژی هاتینه‌ دایین، ب کێفخوەشی، ئەم وان هاریكارییان دێ به‌رده‌وام كه‌ین.

فەرماندارێ فەرماندارییا ناڤەندا ھەماھەنگییا ھەڤپەیمانییا ناڤدەولەتییا دژی داعشێ داڤید ولامس دیار کر: ئەز ڤێ ژی ببێژم، ل گۆر هاریكاریێن کو ژ ھێزێن ئیراقی را ھاتینە دایین، یا کو ژ پێشمەرگە را ھاتییە کرن گەلەک کێمە، مە ل گەل بالیۆزخانەیێن خوە، وەک بالیۆزخانەیێن ئه‌مەریکا، بریتانیا، ئه‌لمانیا و ھۆلاندایێ تیمەکێ شێورمەندا ناڤدەولەتی پێک ئانییە ژ بۆ شێورمەندییا وەزارەتا پێشمەرگە د پرۆسەیا رەفۆرم و یەککرنا ھێزێن وان دا.

ھەری داوی داڤید ولامس دا زانین: 26 پاکێتێن مە یێن جودا ل بەر دەستێ مە نە و ھندەک ژ وان وەک پێوەندی، لۆژیستیک و پێکانینا ھێزەکە نشتمانی، پێشڤەچوونەکا گەلەک باش ھاتییە ب دەست ئێخستن، لێ بەلێ تەڤی ڤێ یەکێ ژی، دڤێت بریارەكا سیاسییا دژوار هه‌بیت ژ بۆ یەککرنا ھێزێن پێشمەرگەیێن کوردستانێ.