ئێزدیێن شه‌نگالێ یێن كو رێخستنا په‌كه‌كێ ب دارێ زۆرێ زارۆ، خۆرت و كه‌چێن وان ره‌ڤاندنه، وێنه‌یێن زارۆیێن خوه یێن نها د ده‌ستێ په‌كه‌كێ دا، گه‌هاندن نه‌ته‌وه‌یێن یه‌كبوویی.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، زوهرا تابووری برێڤه‌به‌را ئۆفیسا نه‌ته‌وه‌یێن یه‌كبوویی یۆنامی یا پارێزگه‌هییا مووسلێ، سه‌ره‌دانا سه‌رده‌شتا چیایێ شه‌نگالێ كرییه و هه‌ڤدیتن ب گه‌لێ ئێزدی را كرنه.
ده‌ست نیشان كر، ئه‌ڤ سه‌ره‌دان ل رۆژا 2 ئادارا ئیسال 2021ێ چێبوویه، زوهرا تابووری ل ڤێ ناڤچه‌یا شه‌نگالێ ل گه‌ل هه‌ژماره‌كا مالباتێن ئێزدی جڤیاییه، یێن كو رێخستنا په‌كه‌كێ زارۆ، خۆرت و كه‌چێن وان ب دارێ زۆرێ ره‌ڤاندنه.
مالباتێن ئێزدییان ژ بۆی نوونه‌را نه‌ته‌وه‌یێن یه‌كبوویی دیار كرنه كو په‌كه‌كێ زارۆیێن وان ب زۆر برنه و وێنه‌یێن وان ژی راده‌ستی ڤی برێڤه‌برا نه‌ته‌وه‌یێن یه‌كبوویی كرنه.
د ڤێ هه‌ڤدیتنێ دا، زوهرا تابووری یا نوونه‌را نه‌ته‌وه‌یێن یه‌كبوویی ژ مالباتێن ئێزدی را گۆتییه كو ئه‌و دێ ته‌عقیبا ڤێ دۆزێ بكه‌ن و دێ هه‌موو هه‌وله‌كێ بده‌ن كو ب ئالیكارییا حكوومه‌تا فه‌ده‌رال یا به‌غدایێ، ئاگاهییان ژ چاره‌نڤیسا زارۆكێن وان بزانن.
ل گۆری ئاگاهیێن تایبه‌ت یێن پێگه‌ها داركا مازی كو ژ مالباتێن ئێزدی یێن شه‌نگالێ وه‌رگرتنه، ژ ده‌ما ئێریشا ته‌رۆرا داعشێ یا ل سه‌ر شه‌نگالێ و كه‌تنا په‌كه‌كێ بۆ ناڤا باژێر، ب سه‌دان، كه‌چ، خۆرت و زارۆكێن ئێزدییان ژ هێلا په‌كه‌كێ ڤه هاتنه ره‌ڤاندن و هێژان چاره‌نڤیسا وان نه‌دیاره.
دایك و بابێن زارۆكێن وان ره‌ڤاندی، ل سالا رابووری حكوومه‌تا فه‌ده‌رال و گه‌لێ ئێزدی ژ ڤان جینایه‌تێن رێخستنا په‌كه‌كێ هایدار كربوو و ئه‌ڤ جینایه‌تێن په‌كه‌كێ ب ده‌واما فه‌رمانا داعشێ ناڤ كربوو.
