قایمەقامێ شنگالێ مەحما خەلیل راگھاند؛ ھەژمارەکا مەزن ژ وان مالباتێن کو ڤەگەریابوونە شنگالێ، ژ بەر نەئارامبوونا رەوشا ئەولەھیێ و خرابیا رەوشا خزمەتگوزاریان و گەفێن چەکدارێن سەر ب پارتیا کارکەرێن کوردستانێ (پەکەکێ) جارەکا دی ئاوارە بوونە.
مەحما خەلیل ژ بۆی شەفەق نیۆزێ راگھاندیە: “ڤەگەرا ئاوارەیان بۆ ناڤچەیا شنگالێ و پرانیا دەڤەرێن سەر ب وێ ناڤچەیێ ڤە راوەستیایە، گەلەک مالباتێن کو ڤەگەریابوون ژی، جارەکا دی رەڤیان و ئاوارەیی دەڤەرێن دی بوونە، ب تایبەتی بۆ ھەرێما کوردستانێ، دا کو ژ گەفێن پەکەکێ و کریارێن وێ، خوە بپارێزن.”
د 9ێ جۆتمەھا 2020ێ دا ھەولێر و بەغدایێ ژ بۆ ئاساییکرنا رەوشا شنگالێ رێکەفتنەک ئەنجام دا. ل گۆر رێکەفتنێ، دڤێت رێڤەبرنا ناڤچەیا شنگالێ ژ لایێ ئیداری، ئەولەھی و خزمەتگوزاری ڤە، ب ئاوایەکێ ھەڤبەش بیت و ھەموو ھێز و کۆمێن چەکداری یێن ل وێ دەرێ، ژ ناڤچەیێ دەرکەڤن.
ھەرێما کوردستانێ ژ پەکەکێ داخواز کریە کو ژ شنگالێ دەرکەڤیت، ژ بەر کو ب هێجەتا ھەبوونا پەکەکێ، ترکیا دەڤەرێن شنگالێ بۆمبەباران دکەت و ئەڤ ژی رێ ل بەر وێ یەکێ دگریت کو ب ھەزاران خەلکێ دەڤەرێ ڤەگەرنە جھ و وارێن خوە، لێ پەکەکە ڤێ داخوازا ھەرێما کوردستانێ جێبەجێ ناکەت و نھا ژی داخوازا بەغدایێ رەد دکەت.
