ھاتە راگھاندن کو رەژیما سووریێ یا ب سەرۆکاتیا بەشار ئەسەد پشتی شەر و کریزێن ناڤخوەیی یێن 10 سالان ب رێیا وەزیرێ دەرڤەیێ سووریێ فەیسەل میقداد نامەیەک ژ بۆ کو دانووستاندنا راستەراست لگەل وان بهێتە کرن ژ بۆی وەلاتێن ئەورۆپایێ شاندیە.
رۆژنامەیا شەرق ئەل-ئەوسەت بەلاڤ کریە، د نامەیێ دا بەحسا دەستپێکرنا دیالۆگێن راستەراست دهێتە کرن، لێ بەلێ وەلاتێن ئەورۆپی بەرسڤا وێ نامەیا نهێنی نەدانە.
ل سەر نامەیا کو شام داخوازا دییالۆگێ لگەل ئەورۆپایێ دکەت، بەرپرسێ ئەولەھیێ و پێوەندیێن دەرڤەیێ یەکیتیا ئەورۆپایێ جۆسێف بۆڕەل بەرسڤەکا نە یەکسەر دایە و گۆتیە: “ھەکە حکومەتا سووریێ گاڤێن راست د رێگەھا راست دا ئاڤێت، ئەم دێ ھەموو بەرسڤێ بدەین دا کو ئەم بگھینە “سووریا یا نوو”. حەتا کو خەباتێن دەرباسبوونا قۆناغا چارەسەریا سیاسی ل سووریێ پێک نەیێن، دێ فەرزکرنا جەزایێن ئابۆری بەردەوام بن، ئاساییکرنا تێکلیان ل سەر چ ئاستان پێک ناهێت و ئەم پشتگریێ نادەینە خەباتێن ژ نووڤە ئاڤاکرنێ.”
ھەروھا دهێتە گۆتن، پشتی ڤێ بەرسڤا جۆسێف بۆڕەل کو ھەلوەستا فەرمی یا یەکیتیا ئەورۆپایێ ل ھەمبەر رەژیما سووریێ نیشان دایە، جارەکا دی فەیسەل میقداد ب ھێسانی نەشێت داخوازەکا ب وی رەنگی یا دییالۆگێ ل ئەورۆپایێ بکەت.
