پارتیا کارکەرێن کوردستانێ پشتی کو ل هەموو ناڤچەیێن سنۆری یێن د ناڤبەرا باشوور و باکورێ کوردستانێ دا راستی شکەستنێ هاتی، نها گرانیا خوە خستیە ناڤچەیا بەرێ گارێ و مەتینا و ئەڤ ناڤچەیە ب تەمامی خستینە بن دەستێ خوە و ژیان ل گەلێ ناڤچەیێ کریە جەهەنەم، پەکەکە کو خوە وەکو پشتەڤانا تەخا کرێکارا ددەتە ناساندن، خوە رێ ب تەخا کرێکار یا ڤێ ناڤچەیێ ژی نادەت کو ب کارێن خوە رابن و ب کەدا خوە و کار کرنا د ناڤا رەز و باغ و ئەردێن خوە یێن چاندنیێ دا زارۆکێن خوە خوەدی بکەن.
چاڤکانیێن پێگەها دارکا مازی ل ئامێدیێ ئاشکەرا کرن، هەر کو دچیت زەختا چەکدارێن پەکەکێ ل سەر گەلێ ناڤچەیێ پێتر دبیت، چاڤکانیێن مە ئەشکەرە کرن کو ل رێکەفتی 2/4/2021ێ چەکدارێن پەکەکێ ل ناڤچەیا “گەلیێ گیزێ” کو دکەڤیتە چیایێ گارە نێزی گوندێ گیزێ یێ سەر ب ناحیا سەرسنکێ ل دەڤەرا بەرێ گارێ، خالەکا کۆنترۆلا رێکێ دانابوو سەر جادەیا سەرەکی یا کو دچیتە دەڤەرا بەرێ گارێ.
دەما کو خەلکی دخواست بچنر سەر گوندێن خوە ژ بۆی پاکژکرنا رەز و باغێن خوە و سەخبێرکرنا وان، چەکدارێن پەکەکێ رێ ل وان گرتیە و خوەستیە پشکنینا وان و ئالاڤێن وان یێن ژ بۆی کار کرنێ د گەل خوە بری بکەن، لێ بەلێ گوندی ب چ رەنگا رازی نەبوونە بهێنە پشکنینکرن و ب چەکدارێن پەکەکێ راگهاندیە کو مافێ وە نینە ڤێ یەکێ د گەل مە بکەن، ئەڤ جیهە سەر ب حکوومەتا هەرێما کوردستانێ یە و ئەم ئازادین، هوون نکارن دەستهلاتداریێ ل سەر مە بکەن، مافێ وە نینە کو مە پشکنین بکەن، ب ڤێ سەدەمێ چەکدارێن پەکەکێ گولـلەیێن هەوایی ل سەر سەرێ وان گوندیان تەقاندینە و ئەو ژ وێ ناڤچەیێ دوور خستنە، گوندی ب نەچاری و ب زۆرا کو پەکەکێ ل وان کری ڤەگەران مالێن خوە.
چاڤکانیێن پێگەها دارکا مازی هەر وەها ئاشکەرا کریە کو د هەمان رۆژ دا، دەما کو ترۆمبێلەکا دن گهشتیە وێ خالا پشکنینێ یا چەکدارێن پەکەکێ، وان چەکدارێن پەکەکێ کو گولـلە بەردابوون گوندیێن دی، داخواز ژ شۆفێرێ ترۆمبێلێ دکەن یەک ژ چەکدارێن وان د گەل خوە ببەتە گوندێ سارکێ یێ سەر ب ناحیا سەرسنکێ، لێ شۆفێرێ ترۆمبێلێ رازی نەبوویە چ چەکدارێن پەکەکێ د گەل خوە ببەت، د بەرسڤێ دا چەکدارێن پەکەکێ دبێژنە وی “ژ خەلکێ ناڤچەیا بەرێ گارێ ب تەنێ هوون یێن ژ گوندێ گویزێ ب ڤی ئاوا نە”! هوون چما گوهداریا مە ناکەن و هاریکاریا مە ناکەن!، لێ دیسا شۆفێر رازی نابیت هیچ چەکدارەکێ پەکەکێ ل ترۆمبێلا خوە سوار بکەت و د گەل خوە دا ببەت، د ئەنجام دا رێ ب شۆفێرێ وێ ترۆمبێلێ ژی ناهێتە دایین دەرباس ببیت، لۆما ڤەدگەریت مالا خوە.
پرانیا جاران ب سەدەما چەکدارێن پەکەکێ کو ل ترۆمبێلێن خەلکێ سڤیل یێن هەرێما باشوورێ کوردستانێ سوار دبن، ترۆمبێلێن وان ژ لایێ بالەفرێن دەولەتا ترکیێ تێن ئارمانج کرن و تووشی زەرەر و زیانێن مادی دبن، پەکەکێ ژی ب ڤێ یەکێ بازارەک سیاسی دکەت و ژ بۆی خوە دکەتە مادەیەکا پرۆپاگاندایێ د چاپەمەنیێ دا.
