رەژیما سووریێ و ھەسەدێ د بابەتێ پەترۆلێ دا رێکەفتن

رەژیما سووریێ و ھەسەدێ د بابەتێ پەترۆلێ دا رێکەفتن

ھاتە راگھاندن کو رەژیما سوریێ ب بەدیلا دانا حەفتانە 200 تانکەر پەترۆلێ د گەل رێڤەبەریا خوەسەرا رۆژئاڤا ل ھەڤ کریە کو رێ بدەت چوونووھاتنا ناڤبەرا ھەرێمێن دەستهەلاتا شامێ و ھەسەدێ.

ل گۆری نووچەیا پێگەها مۆنتۆر حکوومەتا سووریێ 21ێ ئادارێ ھەموو رێیێن دەرباسبوونێ یێن تەبقا، ھەورا و سابکا یێن ھەرێما رەقایێ ل بەر چوونووھاتنا سڤیلان و کارێ بازرگانی گرتن.

پشتی ڤێ ھەلوەستا رەژیمێ ل ھەرێما ژێر کۆنترۆلا ھەسەدێ هەلکشان چێبوو و ڤێ یەکێ ژی باندۆر ل سەر کەلووپەلێن وەکی دەرمان، خوارن و ئالاڤێن ئاڤاکرنێ کر.

ھاتە زانین کو سەدەما گرتنا دەریان ئەو بوو کو رەژیم دخوازیت ژ ژێدەرێن وەکی پەترۆلێ یێن د دەستێ ھەسەدێ دا زێدەتر قازانجێ ب دەست بێخیت.

ل گۆری نووچەیێ ھەسەدێ 4ێ نیسانێ قەبوول کریە پەترۆلێ بۆ ھەرێمێن د دەستێ رەژیمێ دا دابین بکەت و پشتی وێ ژی حکوومەتا شامێ بریارا ڤەکرنا ریێن چوونووھاتنێ دایە.

د رێکەفتنا ھەردو ئالیان دا ھاتیە دیارکرن کو دێ ھەسەدە حەفتانە 200 تانکەرێن پەترۆلێ بۆ ھەرێمێن ژێ کۆنترۆلا رەژیمێ دابین کەت و دێ ل دەڤەرێن ژێر کۆنترۆلا ھەسەدێ ژی ژ بۆ بەشەک بەرھەمێن دەرباس دبن باج هێتە ستاندن.