رژێما ئیرانێ، ئیرۆ لاوه‌كێ دی یێ كورد ل زیندانا ئۆرمیێ یا رۆژهلاتا كوردستانێ سێداره دا، ئه‌ڤه ژی دبیته گرتیێ 7ێ كو ژ 4 ڤێ مه‌هێ، ئه‌ڤ سزا ل سه‌ر دهێته بجهئینان.
رێخستنا هه‌نگاو یا مافێن مرۆڤان ئه‌شكه‌ره كر، ئیرۆ رۆژا شه‌مبی 10/4/2021ێ، ل زیندانا ئۆرمیێ، سزایێ سێداره‌دانێ ل سه‌ر گرتیێ كورد «بایه‌زید رەشیدی» هاته بجهئینان، ناڤبووری ب جینایه‌تا بازرگانییا مادده‌یێن هشبه‌رێ هاتبوو دادگه‌هـ كرن.
ده‌ست نیشان كر، بایه‌زید ره‌شیدی ئیرۆ به‌رێ سپێدێ سزایێ وی هاتییه بجهئینان، ئه‌ڤه ژی دبیته گرتیێ 7ێ یێ كورد كو د ده‌ما 6 رۆژێن رابووری دا، ل زیندانا ئۆرمیێ دهێنه سێداره‌دان.
بایه‌زید ره‌شیدی خەلکی گوندێ کەلهۆر یێ گرێدای ئۆرمیێ یه، ل رۆژا پێنجشه‌مبییا رابووری وه‌كه ئاماده‌كاری بۆ بجهئینانا سزای، بۆ ژوورا تاكه كه‌سی هاتبوو ڤه‌گوهاستن.
هێژای گۆتنێ یه، ل 4 ڤێ مه‌هێ، 3 زیندانیێن كورد و ل 8 مه‌هێ ژی 3 زیندانی، ل زیندانا ئۆرمیێ سزایێ سێداره‌دانێ ل سه‌ر هاتنه بجهئینان.
