ھەسەدێ بەرسڤا وەزارەتا بەرەڤانیا ترکیا دا

ھەسەدێ بەرسڤا وەزارەتا بەرەڤانیا ترکیا دا

ھەسەدێ بەرسڤا وەزارەتا بەرەڤانیا ترکیا کو گۆتبوو د ئێرشەکا ھێزێن وان دا 3 شەرڤانێن یەپەگێ ژیانا خوە ژ دەست دانە دا. ھەسەدە دبێژیت، ئەو نووچە ژ راستیێ دوورە.

ل گۆر داخویانیا ئیرۆ یا وەزارەتا بەرەڤانیا ترکیا، ل ھەرێمێن گرێ سپی و سەرێ کانیێ یێن رۆژئاڤایێ کوردستانێ ھێزێن وان، شەرڤانێن یەکینەیێن پاراستنا گەل (یەپەگێ) کرنە ئارمانج و د ئەنجامێ دا 3 شەرڤانان ژیانا خوە ژ دەست دانە.

وەزارەتا بەرەڤانیا ترکیا، ئیددیعا کر کو ئەو ئێرشا ھێزێن وان وەک بەرسڤدایینەکێ بوو و ل گۆر داخویانیێ، یەپەگێ “ئێرش کریە سەر وێ دەڤەرێ ژ بۆ تێکبرنا ئارامی و سەقامگریێ.”

لێ ئۆفیسا راگھاندنا ھێزێن سووریا دەمۆکراتیک (ھەسەدێ) ئەو داخویانیا وەزارەتا بەرەڤانیا ترکیێ رەد کر و تەکەز کر کو ژ راستیێ دوورە.

داخویانیا ھەسەدێ ب ڤی رەنگی یە، “وەزارەتا بەرەڤانیا ترکیا رۆژا 10ێ نیسانێ ل ھەژمارا فەرمی یا تویتەرێ نووچەیەک بەلاڤ کر کو تێ دا ھاتیە گۆتن 3 شەرڤانێن مە شەھید بوونە. ئەڤ نووچە نە راستە.”

ئارتێشا ترکیێ ل گەل گرووپێن چەکدارێن ئۆپۆزسیۆنا سووریێ، رۆژا 9ێ جۆتمەھا 2019ێ ئێرشەکا بەرفرەھ بۆ سەر رۆژئاڤایێ کوردستانێ دابوو دەستپێکرن و ئەنجامێ دا باژێرێن گرێ سپی و سەرێ کانیێ کەتبوون دەستێ لەشکەر و چەکدارێن ترکیێ.

د ئەنجاما وان ئێرشان دا ب سەدان ھەزار کەسان ژ وان ھەردو باژێران کۆچبەر بووبوون و رەوشا ئەمنی ل وان دەڤەران ب ئاوایەکی گشتی تێک چووبوو.