زوحاكێ سه‌دسالا 21ێ و جه‌لادێن وی

زوحاكێ سه‌دسالا 21ێ و جه‌لادێن وی

په‌كه‌كێ، ئه‌ڤرۆ ناسنامه‌یا 3 كچێن كورد ئاشكرا كر كو ل سالا رابووری ل باشوورێ كوردستانێ ب ده‌ستێ عه‌سكه‌رێ ترك داینه‌ كوشتن، رێخستنێ ئه‌و ژ باكورێ وه‌لات ره‌ڤاندبوون و ل پێناڤێ دۆزه‌كێ ب كوشتن دان كو چ په‌یوه‌ندییا وێ ب گه‌ل وه‌لات ڤه‌ نینه‌.

رێخستنا په‌كه‌كێ، ئه‌ڤرۆ ناسنامه‌یا 3 كچێن كورد كو هێژ د ته‌مه‌نێ سنێله‌یێ دا نه‌ ئاشكرا كر كو ل باشوورێ كوردستانێ ب ده‌ستێ عه‌سكه‌رێ ترك ب كوشتن داینه‌، رێخستنێ ئه‌و ژ باكورێ وه‌لات ره‌ڤاندبوون و پاش ده‌رباسبوونا 7 مه‌هان ژ نوو ڤه‌ ئه‌ڤرۆ هاتییه‌ و پڕ ب روو قایمی سه‌رساغی ل مالباتێن وان كرییه‌ و گۆتییه‌: ئه‌وان ب روحا فه‌دایی یا ئاپۆ جان دا!.

په‌كه‌كێ وه‌ك هه‌ر جار ناڤ و وێنه‌ و زانیاریێن تام ل سه‌ر ڤان سێ كچان به‌لاڤ كرینه‌، لێ به‌لێ چ زانیاری ل سه‌ر ته‌مه‌نا وان نه‌داینه‌، ژ بۆ كو تاوانا ره‌ڤاندنا زارۆكێن كوردان ل سه‌ر رێخستنێ ته‌سبیت نه‌بیت.

ناڤێن ڤان 3 كچان ئه‌ڤه‌نه‌:

  • زیلان گۆك ژ مووشێ.

  • ئەمەل بۆر ژ وانێ.

  • شەھناز ئۆکشاماک ژ ئامه‌دێ.

ما زارۆك تشته‌كی ژ ئیپمریالیزمێ و مۆدەرنیتەیا کاپیتالیست دزانن؟!

ئه‌ڤ هه‌رسێ كچ كو په‌كه‌كێ ژ باكورێ وه‌لات ره‌ڤاندبوون، ل 25 ئیلۆنا سالا رابووری 2020ێ د هێرشه‌كا هه‌وایی یا تركیێ دا جان داینه‌، په‌كه‌كێ ئه‌ڤرۆ پاش ده‌رباسبوونا نێزیكی 7 مه‌هان ژ نووڤه‌ داخویانی دا و تێدا گۆتییه‌: مه‌ 3 هه‌ڤرێین دی گۆری ئاپۆی كرن!.

زیلان، ئه‌مه‌ل و شه‌هناز، هێژ د ته‌منێ سنێله‌یێ دا نه‌، په‌كه‌كێ ئه‌و ژ بۆ دۆزه‌كێ ب كوشتن داینه‌ كو چ په‌یوه‌ندییا وێ ب كورد و كوردستانێ ڤه‌ نینه‌، به‌لكو ئه‌و ژ بۆ ده‌مۆكراتیك كرنا تركیێ كرینه‌ قوربانی، د داخویانیێ دا پڕ ب روو قایمی گۆتییه‌: روحا فه‌دایی یا ئاپۆی كارتێكرن ل ڤان كچان كر، ئایدۆلۆژییا ئاپۆی یا رزگارییا ژنێ ئه‌و كێشانه‌ چیای، ئه‌وان هه‌ر د زارۆكاتییا خوه‌ دا ژ بۆ رێگرتنێ ل فاشیزمێ، ئیمپریالیزمێ، مۆدەرنیتەیا کاپیتالیست خه‌بات كرینه‌، گه‌لۆ ئه‌ڤ چ كه‌لامێ قرێژه‌ په‌كه‌كه‌ دبێژت؟ ما زارۆكێن د ڤی ته‌مه‌نی دا تشته‌كی ژ ئیپمریالیزمێ و مۆدەرنیتەیا کاپیتالیست دزانن؟.

ره‌ڤاندنا زارۆكێن كوردان چاڤكانییا سه‌ره‌كه‌ یا چێكرنا شه‌رڤانانه‌ ژ بۆ په‌كه‌كێ، ئه‌ڤ یه‌ك ژ ئالیێ رێخستنێن ناڤده‌وله‌تی یێن پاراستنا مافێن زارۆكان ڤه‌ هاتییه‌ ته‌سبیت كرن.

خوینا زارۆكێن كوردان فه‌دایێ ئاپۆی بیت

هه‌ر ده‌ما زارۆك یان سنێله‌یه‌كێ كورد د ناڤا رێخستنا په‌كه‌كێ دا هاتبیته‌ قه‌تل كرن، په‌كه‌كێ گۆتییه‌: ئه‌ڤ خوین فه‌دایێ ئاپۆی بیت، هه‌په‌گه‌ د هه‌موو داخویانیێن خوه‌ دا باس ل رۆحا فه‌دایی یا ئاپۆی دكه‌ت، هزر دكه‌ت گه‌لێ كورد ئاگه‌هـ ژ ئاپۆی نینه‌، هزر دكه‌ت گه‌لێ كورد فێم ناكه‌ت‌ كو ئه‌ڤ زه‌لامه‌ بوویه‌ خوین مێژێ خوینا زارۆكێن كوردان‌ و ئه‌و ل ئیمرالیێ ژبۆ ده‌وله‌تا ترك خزمه‌تێ دكه‌ت.

زه‌لامێ ل ئیمرالیێ رازای، یێ كو بوویه‌ به‌لا سه‌رێ گه‌ل، په‌كه‌كێ وه‌كی‌ بۆته‌كی «صه‌نه‌مه‌كی» د سه‌رێ كوردان لێ كرییه‌ و كێم مایه‌ بێژیت ئاپۆ خودایه‌، خودای ژی پێدڤی ب قوربانان هه‌یه‌، ئه‌م ژی ژ به‌ر ڤێ چه‌ندێ زارۆكێن كوردان ژ بۆ خودای دكه‌ینه‌ قوربان.

هه‌گه‌ر مرۆڤ هنده‌كێ ل سه‌ر ئه‌فاسانه‌یا زوحاكی راوه‌ستیت و هزر تێدا بكه‌ت، دێ ب زه‌لالی ئاشكرا بیت كو ئه‌ڤه‌ نه‌ئه‌فسانه‌یه‌، زوحاك هێژ ساغه‌ و جه‌لادێن وی رۆژانه‌ خوینا زارۆكێن كوردان ژ بۆی وی فه‌دا دكه‌ن.

پوستێن ھەمان بەش