پێتر ژ 8 سالان ل سەر رەڤاندنا 8 ئەفسەرێن کوردیێن ژ رێژیما سووریێ جودا بووی دەرباس دبن، هێژان ژی چارەنڤیسێ وان ناهێتە زانین، و کەسێ چ ئاگاھی و زانیاری ل سەر وان نینە. سەرەرای بانگێن بەردەوام، دیسا مالابتێن ڤان ئەفسەرێن کورد بانگا خوە گھاند سەرۆک مەسعوود بارزانی و ھەموو لایەن و پارتیێن سیاسی کو فشارێ ل سەر پەیەدێ بکەن دا کو چارەنڤیسێ ڤان ئەفسەرێن کورد دیار بکەن.
8 سالن، و ھەر 8 ئەفسەرێن کوردیێن ژ رێژیما سووریێ جودا بووی چارەنڤیسێ وان نەدیارە، هەرچەند کو ل ھەرێمێن د بن دەستێ پارتیا یەکیتیا دەمۆکراتیک پەیەدێ دا ھاتبوونە بنچاڤکرن، و د 16ێ نیسانا 2013ێ نووچەیێن وان ھاتنە برین، لێ پەیەدە دانپێدانێ ب ھەبوونا وان ئەفسەران د زندانێن خوە، یان ژی رادەستکرنا وان بۆ رێژیما سووریێ ناکەت.
پشتی شۆرەشا سووریێ ب ھەزاران ژ ئەفسەر و چەکداران ژ ئارتێشا رێژیمێ جودا بوون، ھەروھا ب ھەزاران کوردێن کو بنەچاری ببوونە لەشکەرێن رێژیمێ ژ رێزا لەشکەرێ سووریێ جودا بوون.
د مەھا نیسانا 2013ێ دا 8 ئەفسەرێن کورد ژ ئارتێشا رێژیمێ جودا بوون، و بریارا ھاتنا ھەرێما کوردستانێ دا، پشتی کو خوە گەھاندیە باژێرێ قامشلۆ یێ رۆژئاڤایێ کوردستانێ کو د وی دەمی و تا نھا ژی ئەو باژێر د بن دەستێ پەیەدێ دایە، دەنگووباسێن وان ھاتنە برین.
ئەفسەرێن کورد ئەڤە نە:
عەمید محەمەد خەلیل، خەلکێ باژێرێ بابێ یێ رۆژھلاتێ حەلەبێ
عەقید محەمەد ھەیسەم، خەلکێ باژێرێ عەفرینێ یە
عەقید حەسەن ئۆسۆ، خەلکێ باژێرێ عەفرینێ یە
عەقید محەمەد گولە خێری، خەلکێ باژێرێ عەفرینێ یە
موقەدەم شەوقی عۆسمان، خەلکێ باژێرێ عەفرینێ یە
راید بەھزاد ناسۆ، خەلکێ باژێرێ عەفرینێ یە
نەقیب حسێن بەکر، خەلکێ باژێرێ عەفرینێ یە
مولازم ئەوەل عەدنان بەرازی، خەلکێ باژێرێ کۆبانێ یە
مالباتێن ڤان ئەفسەرێن کورد تەکەز دکەن کو ب دەستێ پەیەدێ ھاتنە رەڤاندن، د داخویانیەکێ دا، کو د سالڤەگەرا 8ێ یا بێ سەرۆشینکرنا وان دا ھاتبوو بەلاڤکرن، ب زەلالی ئەشکەرا کرن کو ئەڤ ئەفسەرێن کورد ل گوندێ سوێدیێ یێ دێرکێ ھاتینە رەڤاندن.
