چەکدارێن سەر ب ترکیا ڤە دەست دانا سەر 40 دۆنم زەڤیێن ھەموەلاتیێن کورد

چەکدارێن سەر ب ترکیا ڤە دەست دانا سەر 40 دۆنم زەڤیێن ھەموەلاتیێن کورد

د چارچۆڤەیا گوھارتنا جوگرافیا عەفرینێ و بجھکرنا عەرەبان ل ھەرێمێ، گرۆپەکێ چەکدار یێ سەر ب ترکیا ڤە دەست دانا سەر نێزیکی 40 دۆنم زەڤیێن خەلکێ ناڤچەیا شیێ، ژ بۆ کو خانیان بۆ کۆچبەرێن عەرەب ئاڤا بکەن.

رێخستنا مافێن مرۆڤان ل عەفرینێ بەلاڤ کر، فەرماندارێ گرۆپا سولتان سلێمان محەمەد ئەل-جاسم (ئەبوو ئەمشێ) ب ئارمانجا ئاڤاکرنا خانیان ژ بۆ کۆچبەرێن عەرەب، دەست دانایە سەر نێزیکی 40 دۆنمێن زەڤیێن خەلکێ ناڤچەیا شیێ و زۆر ل خوەدیێن وان زەڤیان کریە و ئەو ناچار کرنە کو ل سەر “گرێبەستێن بەخشینێ” ل شارەداریا ناڤچەیێ ئیمزایێ بکەن.

زەڤیێن ھاتنە دەستەسەرکرن:

6 ھەزار مەترێن چارگۆشە یێن محەمەد حاج ئیبراھیم شێخۆیە، ئەبوو ئەمشێ زۆر ل کورێ وی جەمیل کریە و ئەو نەچار کر ل شوونا بابێ خوە یێ بەری 20 سالان مری ل سەر گرێبەستا بەخشینێ ئیمزا بکەت، بێیی کو وی وەکالەت ھەبیت.

9 ھەزار مەترێن چارگۆشە یێن جەمیل خەلیل شێخۆ نە، ئەبوو ئەمشێ زۆر ل کورێ وی فەرید کر و ئەو نەچار کر ل شوونا بابێ خوە گرێبەستا بەخشینێ ئیمزا بکەت.

2 ھەزار مەترێن چارگۆشە یێن یووسف حەنان مامۆ نە.

7 ھەزار مەترێن چارگۆشە یێن شێخ حوسێن (خۆجە) نە.

7 ھەزار مەترێن چارگۆشە یێن ئەحمەد مستەفا مستێ نە، ئەبوو ئەمشێ زۆر ل نەڤیێ وی عەبدولا کر و ئەو نەچار کر گرێبەستا بەخشینێ ئیمزا بکەت.

2 ھەزار مەترێن چارگۆشە یێن رەشید سلێمان رەشکۆرە.

6 ھەزار مەترێن چارگۆشە یێن محەمەد عەلی مستکێ نە.

ل گۆر چالاکڤانێن عەفیرنێ، ژ دەما داگیرکرنا عەفرینێ ژ لایێ ئارتێشا ترکیا و گرۆپێن چەکدارێن سەر ب وێ ڤە د ئادارا 2018ێ دا، ب ئاوایەکێ سیستەماتیک کار ل سەر گوھارتنا جوگرافیا عەفرینێ و نەھێلانا ناسنامەیا کوردبوونا عەفرینێ دهێتە کرن و ب ھەزاران خانی، زەڤی، مال و ملکێن کوردێن عەفرینێ ھاتنە دەست ب سەرداگرتن.