ھەولدانێن پەکەکێ و میلیشیایێن حەشدا شەعبی یێن گرێدایی ئیرانێ، ژ بۆ ئاستەنگ درسوتکرنا ل همبەر جێبەجێکرنا رێکەفتنا د ناڤبەرا بەغدا و ھەڤلێرێ دا کو ب رێکەفتنا شنگالێ دهێتە ناسکرن بەردەوامن. د هەولێن هەری داوی دا ڤان دو هێزێن نە قانوونی یێن ل شەنگالێ رێکەفتن کریە کو سێ فەوجێن لەشکری ژ ئێزدیان دروست بکەن.
چاڤکانیێن پێگەها دارکا مازی ل شنگالێ ئاشکەرە کر، هەر یەک ژ پەکەکێ و حەشدا شەعبی ب سەرپرشتی یا ئەبو فەداک، سەرۆک ئەرکانێ حەشدا شەعبی، کو یەک ژ وان کەسانە کو ناڤێ وی د لیستەیا تەرۆریستان دا یە ل جەم ئامەریکا و کەسەکێ باوەرپێکری بوویە ل جەم قاسم سولەیمانی یێ فەرماندارێ فەیلەقا قودس یا سوپایێ پاسدارێن ئیرانێ، رێکەفتن کریە کو سێ فەوجێن لەشکری ژ کوردێن ئێزدی یێن شنگالێ دروست بکەن کو هەر یەک ژ وان فەوجان ژ 200 هەیا 300 چەکداران پێک دهێت.
چاڤکانیێن مە هەر وەها ئاشکەرا کر، نها یەک ژ وان فەوجان هاتیە دروستکرن و ب فەوجا 80ێ هاتیە بناڤکرن، بریار هاتیە دان کو ژ بۆی هەر چەکدارەکی 900 هەزار دینارێن ئیراقێ وەکو مووچە بێنە خەرج کرن، لێ بەلێ پشترا پەکەکێ و حەشدا شەعبی رێکەفتن کریە نیڤا ڤی پارە بدەنە چەکداران و نیڤا دی د ناڤبەرا خوە دا پارڤە بکەن، ئەڤ یەک ژی خوەیا دکەت کو کوردێن ئێزدی لە جەم ڤان دو هێزێن نە قانوونی ب تەنێ وەکو ئاموور تێنە بکارئانین و ئێزدیان هیچ نرخەک ل جەم وان نینە، تشتا ژ بۆی ڤان دو میلیشیایان گرنگ ب تەنێ دەست خستنا پارە و پاراستنا هیلالا شیعی یا ئیرانێ یە.
