سپایێ پاسداران یێ ره‌ژیما ئیرانێ گوللـه به‌ردان خورته‌كی كورد و پاش كو ب گرانی بریندار کری، ره‌ڤاند و پشترا مالباتا وی هایدار كر كو جان داییه.
رێخستنا هه‌نگاو یا مافێن مرۆڤان ئیرۆ چیرۆكا كوشتنا گەنجەکێ كورد ب ده‌ستێ سپایێ پاسداران پارڤه‌كرییه و تیدا هاتییه: ل رۆژا 14/4/2021ێ، سپایێ پاسداران گوللـه به‌ردان مالا گەنجەکێ كورد ب ناڤێ ئه‌حمه‌د ئه‌رسن كو ژ ئاکنجیێن باژێرۆكێ ماكۆ یێ گرێدای ئۆرمیێ یه و ب گرانی بریندار كر.
ده‌ست نیشان كر، سپایێ پاسداران پاش كو ئه‌ڤ كه‌سە بریندار كری، ل گه‌ل خوه برن و پاش چه‌ند رۆژه‌كان مالباتا وی هایدار كر كو ئه‌حمه‌د جانێ خوە ژ دەست دایە.
ل گۆری رێخستنا هه‌نگاوێ، ل رۆژا كو ئه‌حمه‌د هاتییه بریندار كرن، سپایێ پاسداران دوو گەنجێن دی ژی بن چاڤ كرنه، یه‌ك ژێ د ته‌مه‌نا 16 سالیێ دا یه.
