ژ دوهـی ئێڤاری هەیا نها، دەولەتا ترکیا ب ئاوایەکێ بەرفرهـ دەست ب داگیرکرنا خاکا باشوورێ کوردستانێ ل سنۆرێ بەرواری بالا و نێروە رێکان کریە.
پشتی کو دوهـی 23/4/2021ێ دەولەتا ترکیا ئۆپەراسیۆنەک ژ بۆی سەر پێگەهێن پەکەکێ ل زنارا گوندێ کێستە یێ سەر ب دەڤەرا بەرواری بالا ڤە دەستپێکری و د دەما 30 خۆلەکان دا ئەو زنار داگیر کری، ئیرۆ ژی ئۆپەراسیۆنا خوە بەردەوام کر و ب کوراهیا 10 کیلۆمەتران ل ناڤچەیێن نێروە و رێکان، باشوورێ کوردستانێ داگیر کر، پەکەکە ژی وەکو هەر جار پاشڤە ڤەدکێشیت و ناڤچەیێ ب جیهـ دهێلیت.
چاڤکانیێن پێگەها دارکا مازی ل باشوورێ کوردستانێ ئاشکەرا کر، ئیرۆ رۆژا شەمبی لەشکرێن دەولەتا ترکیێ پشتی کو زنارا چیایێ کێستە ل دەڤەرا بەرواری بالا داگیر کری، ب کوراهیا 10 کیلۆمەترۆیان ل ناڤچەیێن نێروە و رێکان ژی هاتینە ناڤا هەرێما کوردستانێ دا و هەیا نێزی گوندێ پیدە یێ سنۆرێ هۆزا رێکانیا بێ کو هیچ شەرەک ژ ئالیێ پەکەکێ ڤە بێهێتە کرن، داگیر کریە.
پشتی کو ژ دوهـی ئێڤاری هەیا سەرێ سبێ لەشکرێن ترکیا ئاقارێن هەر سێ گوندێن کێستە، هرۆر و چەلکێ تۆپباران کری و پشترا ئەو جیهـ داگیر کری، ئیرۆ ژی ل ناڤچەیێن سەر ب هۆزێن نێروە و رێکانیا کو سەر ب ئامێدیێ نە ب کوراهیا 10 کیلۆمەترۆیان داگیر کرن، ئەڤ یەک ژی بۆ سەدەما نەرازیبوونا شێنیێن ڤان گوندان و داخواز ژ پەکەکێ کر ئێدی نەبیتە سەدەم کو ترکیا ب هێنجەتا هەبوونا چەکدارێن وان، گوندێن وان داگیر بکەت.
شێنیێن ڤان گوندان داخواز کر یان پەکەکە ل دژی لەشکەرێن ترکیێ شەری بکەت، یان ژی ب تەنێ د دەما ئارامیێ دا ل گوندێن وان خوەدی نەدەرکەڤیت و ب ناڤچەیێن پاراستنا مەدیا ب ناڤ نەکەت، شێنیان هەر وەها راگهاند ئەڤ کارێ پەکەکێ ب تەنێ بەهانە دانە دەست دەولەتا ترکیێ یە داکو ڤان گوندێن باشوور ژی وەکو گوندێن باکورێ کوردستانێ داگیر بکەت، شێنی دخوازن پەکەکە و ترکیا شەرێ خوە ل ناڤچەیێن وان دوور بکەن داکو ئەو بکارن د رەوشەکا نۆرمال دا بژین.
