سەرئەرکانێ ھێزێن پێشمەرگە جەمال ئێمینکی ل سەر ئێریشا چەکدارێن داعشێ یا ل سنۆرێ پردێ و دوبزێ راگھاند؛ “داعش مفایێ ژ ڤالاھیا ئەولەھیێ یا ناڤبەرا ھێزێن پێشمەرگە و ھێزێن ئیراقێ وەرگرتیە و بەری نھا چەندین جار حکوومەتا ھەرێما کوردستانێ داخوازا تژیکرنا وێ ڤالاھیا ئەولەھیێ کریە، لێ بەلێ ھێزێن ئیراقێ ھێژان ژی ئەو ڤالاھیا ئەولەھیێ تژی نەکرینە.”
جەمال ئێمینکی ژ بۆ K24ێ ئاشکەرا کر: “ژ خانەقینێ حەتا رۆژئاڤایێ دیجلەیێ، ڤالاھیا ئەولەھیێ د ناڤبەرا ھێزێن پێشمەرگە و ھێزێن ئیراقێ دا ھەیە، ئەڤە ژی بوویە سەدەما وێ یەکێ کو چەکدارێن داعشێ، خوە رێخستن بکەن و ئێریش و کریارێن خوە زێدە بکەن.”
ئێمینکی دەستنیشان کر: “مە چەندین جارا گۆتیە ھێزێن ئیراقێ، ھەبوونا ڤالاھیا ئەولەھیێ، سەدەما چالاکبوونا داعشێ یە. دڤێت ب ھەماھەنگی و ھەڤبەشی، ئەم ڤالاھیێ تژی بکەین، لێ ھشیاریێن مە ب جدی وەرنەگرتن و ئالیێن ئیراقێ ژ بۆ رێکەفتنێ گاڤ نەهاڤێتن.”
سەرئەرکانێ ھێزێن پێشمەرگە جەمال ئێمینکی دیار کر: “مە د جڤینان دا ل گەل لیژنەیا وەزارەتا بەرەڤانییا ئیراقێ ل سەر وێ یەکێ ل ھەڤ کربوو کو چار ناڤەندێن ھەماھەنگیێ ڤەکەین، لێ حەتا نھا تەنێ دو ناڤەند ھاتنە ڤەکرن، یەک ل ھەولێرێ ویا دی ل بەغدایێ یە.”
