وەزیرێ بەرەڤانیێ یێ ترکیێ دا خویاکرن، ئەو رێزێ ل سەروەرییا ئاخا ئیراقێ دگرن و ئارمانجا ئۆپەراسیۆنا ل سەر سینۆرێ باشوورێ کوردستانێ تەنێ ژناڤبرنا په‌كه‌كێ یە.
وەزیرێ بەرەڤانیێ یێ ترکیێ خولوسی ئاکار گۆت: ئەم رێزێ ل سینۆر و سەروەرییا ھەموو جیرانێن خوە دگرن د سەری دە یێ ئیراقێ، ل باکورێ ئیراقێ ژی، ل باکورێ سووریێ ژی چ ئارمانجەکە مەیا دن نینە.
دیار کر ژی، وان ژ 23ێ نیسانێ دەست ب ئۆپەراسیۆنا پەنچە برۆسک کرییە و ژ وێ دەمێ ڤە 68 گەریلایێن په‌كه‌كێ د ئۆپەراسیۆنێ دە جانێ خوە ژ دەست دانە، نھا ل ئاڤاشین – باسیان و مەتینا ئۆپەراسیۆن ددۆمن.
رۆژا 1ێ گولانێ وەزیرێ بەرەڤانیێ یێ ترکیێ خولوسی ئاکار سەردانا بنکەیەکە سەربازییا وەلاتێ خوە یا ل دەڤەرەکە سینۆرێ ھەرێما کوردستانێ کربوو، خکوومەتا ئیراقێ نەرازیبوون ل سەر وێ سەردانێ نیشان دا و گۆت کو وەزیرێ بەرەڤانیێ یێ ترکیێ خولوسی ئاكار بێی ھەماھەنگی یان رزامەندییا پێشوەخت ب ئاوایەکی نەرەوا دەرباسی ناڤ ئاخا ئیراقێ بوویە.
ل سەر وێ یەکێ ژی، وەکیلێ وەزارەتا دەرڤە یێ ئیراقێ نزار خەیروللا، کاربرێکەرێ بالیۆزخانەیا ترکیێ بانگی وەزارەتێ کر و نامەیەکا نەرازیبوونێ رادەستی وی کر.
