سه‌رۆكێ سووریێ، په‌كه‌كێ ب هه‌ڤپه‌یمانییا رژێما خوه دزانیت و دبێژیت: ڤێ رێخستنێ ده‌ستكه‌فتیێن پڕ باش بۆ مه چێكرینه.
ریاز حیجاب كو ژ مه‌ها خزیران هه‌تا ته‌باخا سالا 2012ێ، سه‌رۆكوه‌زیرێ سووریێ بوو، د به‌رنامه‌یه‌كێ تێله‌فزیوونی دا باس ل بوویه‌ره‌كێ كر كو ئه‌و ب خوه تێدا ئاماده بوو و گۆت: ب هێڤی مه هایا گه‌لێ مه ل جه‌زیرێ، فراتێ و ته‌ڤاهییا سووریێ هه‌بیت كو ل رۆژا 21/7/2012ێ، پاش هلوه‌شیانا شانه‌یا قه‌یرانان، به‌شار ئه‌سه‌دی فه‌رمان دا یه‌كه‌یێن سوپا و هێزێن ئه‌وله‌هیێ یێن سووریێ ژ جه‌زیرێ بهێنه ڤه‌كێشان و ناڤچه ب ته‌ڤاهی و چه‌ك راده‌ستی په‌كه‌كێ بهێنه كرن.
ریاز حیجاب دبێژیت: ل وی ده‌می به‌شار ئه‌سه‌دی ل كۆچكا كۆماری كۆمبوونه‌ك چێكر، ئه‌ندامێن پارتییا به‌عس یا سووریێ تێدا به‌شدار بوون، د كۆمبوونێ دا دانوستاندن هاته كرن كانێ بۆچی شانه‌یا قه‌یرانان بهێته هلوه‌شاندن و بۆچی ناڤچه و چه‌كێن سوپای راده‌ستی په‌كه‌كێ بهێنه كرن؟
ئەسەد: ژ بۆ کۆنترۆلكرنا جادده‌یا کوردی پێویستییا مه ب په‌كه‌كێ هه‌یه
ل گۆری گۆتنا ریاز حیجاب، د به‌رسڤا ئه‌ندامێن حزبا به‌عس دا، به‌شار ئه‌سه‌د گۆت كو په‌كه‌كه هه‌ڤپه‌یمانا وانه و ل سالێن رابووری ڤێ رێخستنێ ده‌ستكه‌فتیێن پر باش بۆ رژێما سووریێ چێكرینه، نها ژی وان پێویستی ب په‌كه‌كێ هه‌یه ژ بۆ كو جادده‌یا كوردی بهێته كۆنترۆل كرن، هه‌موه‌خت ئه‌و دێ وه‌ك خه‌نجه‌ره‌كێ بن بۆ كه‌مه‌را تركیێ.
پاش ده‌ست پێ كرنا شۆرشا گه‌لێ سووریێ ل سالا 2011ێ، رژێما ئه‌سه‌د ب هاریكارییا ئیرانێ، رێككه‌فتن ل گه‌ل په‌كه‌كێ چێكر، پشتره و ل گۆری وێ رێككه‌فتنێ، رژێم ژ رۆژئاڤایێ كوردستانێ هات ڤه‌كێشان و هه‌موو ناڤچه راده‌ستی په‌كه‌كێ كر.
