دڤێت ئەم کورد ئێدی بێژینە ڤی ھش و مەنتقێ سییاسی بەسە !

دڤێت ئەم کورد ئێدی بێژینە ڤی ھش و مەنتقێ سییاسی بەسە !

دۆزا کورد و کوردستانێ دۆزەکا نەتەوی یە، دۆزێن نەتەوەتی ب گشتی ب ستراتەژی و ب یەکیتییێن نەتەوی ڤە سەرکەفتینە.!

لێ ھەزار مخابن، د ھش و مێژویێن سییاسەتا مە کوردان دا، پۆلیتیکا یەک گرتنێ نینە و دڤێت ئەم کورد ڤێ راستییا خوە قەبوول بکەین.

گەلەک کەس ڤێ رەوشێ ب لاوازبوونا ھەستێن نەتەوی ڤە گرێددەن، لێ ئەڤە نە راستە. د ناڤ کوردان دا ھەستێن نەتەویی یێن خورتن، کوردان بەدەلێن مەزن دان. شکەستنا سەرھلدان و بەرخوەدانێن کوردان، ژ بێ تفاقییا ناڤ کووردان بوویە و ئەڤ راستییە ئێدی ناهێتە ڤەشارتن. ئیرۆ ژی ئەڤ رەوشا سییاسی د ناڤ کوردان دا بەردەوامە و فەیلەسۆفێ مەزن یێ نەمر ئەحمەدێ خانی ژی ئەڤ راستیا مە کوردا ئانییە زمان.!

ئەڤ رەوشە تەنێ ل باکوورێ کوردستانێ نینە و ل ھەرچار پارچێن کوردستانێ ھەیە، کێم و زێدە ژ ھەڤ جودا نینە.

ئەم بێنە سەر رەوشا باکوورێ کوردستانێ؛

ل باکور کوردان بەدەلێن مەزن دان و ددەن، لێ مخابن گاڤا ئەم ل ئانجامێن سیاسی دنێرین، چ دەستکەفتەکێ کوردا یێن سییاسی نینە. “وەکو قیتارەکا ل سەر خەتێ دهێت و دچیت، تەنێ مرۆڤ لێ سوارببن و پەیا ببن” سیاسەت قالبەکێ مەکانیکی نینە، ل گۆر شەرت و مەرجان دڤێت خوە بگوھریت.!

ھەتا کەنگی دێ ب ڤی رەنگی بەردەوام بیت، ما ئێدی نە بەسە ؟

دڤێت ئەم ب دەنگەکێ بلند ڤە بێژن ئێدی بەسە !!!

سییاسەتا باکور، 95% ل سەر رەخنە کرنێ ڤە دهێتە مەشاندن. سەدەمێ وی ژ نە گوھارتنا سییاسی و بێ ئالتەرناتیفبوونێ یە.

ھەدەپە/ پەکەکە ل جھێ کو خوە بگوهرن، حکومەتا ئاکەپێ رەخنە دکەن و پارتی و رێخستنێن کوردان یێن دی ژی ھەدەپە/پەکەکە رەخنە دکەن. ب گرانی رۆژەڤا سییاسی ل باکورێ کوردستانێ بێ ئالتەرناتیفە…

ستراتەژییێن ھەدەپێ/پەکەکێ “کۆمارا دەمۆکراتیک” و دەمۆکراتیک کرنا ترکییا وەک ستراتەژیا سییاسی کرییە ئارمانج، ل گۆر وێ ئارمانجێ “یەکیتی و رێکەفتنا“ دکەت. لێ ل سەر ستراتەژیێن وەھا پۆلیتیکەک نەتەوی و یەکیتی د ناڤبەرا کوردان دا پێک ناهێت…

داخوازا یەکیتیا کوردان، ژ بۆ “خاپاندنا” ئالیگرا نە، ژ بەر کو ھەژمارەک مەزن کوردێن ئالیگرێن ھەدەپێ، ژ وێ پێڤاژۆیا سییاسی نە رازینە. ژ بۆ کو وان ئالیگران کو خۆدان ھەستێن نەتەوی نە ل دەر-دۆرا خوە راگریت، ھەروھا بانگێن یەکیتییان دکەت، لێ ئەڤ داخوازە ھەموو ژ بۆ پرۆپاگاندایێن سییاسی نە…

پارتییێن کوردان یێن دی، ھەر چەند فەدەراسیۆن و مافێن چارانووس کربنە پرۆگرامێن خوە، لێ پراکتیک و پۆلیتاکا وان ژ ھەدەپێ جوداتر نینە. دبیت کو ھندەک بێژن “چاوا دبیت ئەم و ھەدەپە وەک ھەڤ بین”؟ بەلێ، پرانی-پۆلیتیکا ھەموو پارتییێن کوردان یێن باکور د چارچۆڤێن “یاسایێن” دەولەتێ دا پۆلیتیکایێ دکەن. ئارمانجا وان، ب رێیا پەرلەمانێ ترکا ڤە بۆ گوهارتنا دەستوورا بنگەھییە و ب دەستخستنا مافێن وەک ھەڤیێ یە. ب کورتاسی پۆلیتیکا پاریتی و رێخستنان ئەڤەیە.

ھەروھا د پۆلیتیکا ڤان دا یەکیتییەکا نەتەوی نینە. یەکیتییا نەتەوی، ب داخوازێن ل سەر “مەدیایا جڤاتی” ڤە دروست نابن. ھەگەر رێخستنەک د پۆلیتیکا خوە یا یەکیتییێ دا جدی بیت، دێ بۆ یەکیتییێ کۆمسییۆنەکا یەکیتییێ و دیالۆگێ ئاڤا کەت و دەست ب ھەڤدیتنان کەت. لێ پرانییا پارتی و رێخستنان داخوازێن وان ژ بۆ یەکیتییێ، وھایە: “وەرن د ناڤ پارتییا مە دا جھ بگرن و ئەم ب ھێز ببین، کو بۆ یەکیتییان رۆلەکێ بگێرین”؟

لێ مخابن ئەڤ پارتی و رێخستنە دەما کو ب ھێز بوون ژی نەکاریبوون یەکیتییێن بەردەوام ئاڤا بکرانا. سەدەما لاوازبوونا وان ژ پۆلیتیکا وان یا رێخستنی دهێت و پەیدابوویە، نە کو د جڤاکی دا ھەستێن نەتەوی لاوازن، یان ژی ژێ دوور کەتنە. بەرەڤاژی ئیرۆ ھەستێن نەتەوی د جڤاکا کورد و کوردستانێ دا خورت و ب ھێزە، خواندن و پێشکەتن د جڤاکا کورد و کوردستانێ دا گەلەک پێشکەتییە.

گاڤا پارتی و رێخستن ل گۆر بەرژەوەندییێن نەتەوی پۆلیتیکایێ نەمەشینن، جڤاک پشتگرییێ لێ ناکت، ئەڤە ب تەنێ د ناڤ کوردان دا وەھا نینە و کێم-زێدە ل ھەموو وەلاتان وھایە.

ل وەلاتەکێ وەک کوردستانێ کو ھاتییە داگیرکرن، ھەموو مافێن مرۆڤان و سییاسی ھتد، کو ھاتینە قەدەغە کرن، سییاسەت کرن ئاسان نینە. لێ د سەردا ژی کو سیاسەت بەرژەوەندییێن گەلی پشتگوھ بکەت و دووری بەرژەوەندییێن نەتەوێ سییییاسەتێ بکەت، ئەنجام ژی دێ وەک ئیرۆ بن.!

سییاسەت ژ بۆ چارەسەر کرنا پرسگرێکێن جڤاکی دهێتە کرن، گاڤا کو سییاسەت ژ ڤان ئارمانجان دوور کەت، هەلبەت دێ لاواز بیت. ئیرۆ خواستەک و بەرژەوەندییێن گەلێ کوردستانێ، پێدڤی ب یەکیتیەکا نەتەوی و  پۆلیتیکایەکا نەتەوی ھەیە. گاڤا کو سییاسەت بەرپرسییارییا خوە جێبەجێ نەکەت، دێ جڤاک ژی ژ سییاسەتێ دوور کەڤیت. گەڤا ھێزێن کوردستانێ وەک لایەنەکێ کوردستانێ یەکیتییەکێ ئاڤا بکەن، دێ باندۆرا وان ل سەر پارتییێن ترکان و حکومەتا ترک زێدە بیت، ھەروەھا د ئاستا نەڤنەتەوی دا ژی دێ زێدەتر هاریکاریێ وەرگرن.!

گەڤا کو یەکیتی د ناڤبەرا پارتی و رێخستنێن کوردستانێ دا نەبیت، دێ وەک پارتییێن ترکان، نیقاشان ل سەر پۆلیتیکا دەستھلاتدارییا ترکا کەن و داوییێ دا بەهرا کوردان دێ زلم بیت.

ئێدی بەسە، دڤێت ئەڤ پۆلیتیکا کوردان بێتە گوھارتن !!!

خەلیل سیپان

8ی گۆلانا 2021

پوستێن ھەمان بەش