بۆچی ئه‌مه‌ریكایێ د نها دا باس ل رۆلا یه‌نه‌كێ د كوشتنا سوله‌یمانی دا كر؟
ئه‌مه‌ریكایێ مژارا كوشتنا قاسم سوله‌یمانی جاره‌كا دی وه‌ك ڤۆلكانێ ته‌قاند، ئۆپه‌راسیۆن ئاشكرا كر و هه‌ر تشت دانا سه‌ر مێزی، تشتێ كو نه‌چاڤه‌رێكری بوو بهێته ئیفشا كرن، به‌شدارییا «دژه ته‌رۆرا ئێكه‌تیێ» بوو، ڤێ وورده‌كاریێ لاهور ئێخسته د ره‌وشه‌كا موحرج دا و دیاربوو ئه‌و ب رۆژ زه‌لامێ ته‌هرانێ و ب شه‌ڤ یێ واشنتۆنێ یه.
ما هێزا ده‌لتا چ پێدڤی ب دژه تیرۆرا ئێكه‌تیێ هه‌یه؟
هێزا كو قاسم سوله‌یمانی و ئه‌بو مه‌هدی موهه‌ندس كوشتی، هێزه‌كا بژاره یا ئه‌مه‌ریكی یه ب «ده‌لتا» دهێت ناس كرن، ده‌لتا هه‌مان هێزه یا كو بن لادن، ئه‌بو به‌كر به‌غدادی كوشتی، وێ هند بسپۆری هه‌یه كو ل ده‌ما ئارمانجه‌ك دهێته ده‌ست نیشان كرن كو بهێته ژ ناڤ برن، پێدڤی ب چ ئالییه‌كی نابیت، لێ به‌لێ ده‌لتایێ ژ بۆ ئارمانج گرتنا سوله‌یمانی هاریكاری ژ دژه ته‌رۆرا ئێكه‌تیێ خواست، پرس ئه‌ڤه‌یه، «بۆچی هێزه‌كا ب ڤێ ته‌كنۆلۆژییا و بسپۆریێ ڤێ هاریكاریێ ژ مالباتا جه‌نگی بخوازیت؟ ما قاسم سوله‌یمانی بۆ ئه‌مه‌ریكایێ ئارمانجه‌كا ژ بن لادن و به‌غدادی زه‌حمه‌تر بوو؟».
ئه‌مه‌ریكایێ ژ بۆ ئارمانج گرتنا سوله‌یمانی چ پێدڤی ب شیان و بسپۆرییا زه‌لامێن دژه ته‌رۆرا ئێكه‌تیێ نینه، لێ به‌لێ ئه‌مه‌ریكایێ ب مه‌به‌ست هنده‌ك ئه‌ندامێن دژه ته‌رۆرا ئێكه‌تیێ ته‌ڤلی ئۆپه‌راسیۆنێ كرن، ژ بۆ كو پشتره بكاریت وه‌ك كارته‌كا فشارێ ب كار بینیت و ئێكه‌تیێ ل همبه‌ری ئیرانێ و شیعه‌یێن ئیراقێ پێ شه‌رمه‌زار بكه‌ت.
خوه‌یایه ئێكه‌تیێ رێككه‌فتنه‌كا ستراتیجی ل گه‌ل ئیرانێ هه‌یه، ل سه‌ر ڤی بنگه‌هی ژی په‌یوه‌ندیێن گه‌له‌ك باش د گه‌ل حه‌شدا شه‌عبی و شیعه‌یێن ئیراقێ هه‌نه، ئه‌مه‌ریكا یا كو دخوازیت ئیرانێ ل ده‌ڤه‌رێ بێ باندۆر بكه‌ت، ژ ڤێ نێزیكبوونا ئێكه‌تیێ و ئیرانێ عاجزه و ئه‌ڤ یه‌ك ئاشكرا گۆتییه ئێكه‌تیێ.
ل 13 مه‌ها رابووری ئه‌مه‌ریكایێ ب زه‌لالی گۆتبوو لاهور و باڤێل: ئێدی ده‌م هاتییه هوون ده‌ست ژ ئیرانێ به‌رده‌ن
داوی په‌یاما كو ئه‌مه‌ریكایێ ب لاهور جه‌نگی و باڤێل تاله‌بانی دای، ل رۆژا 13 مه‌ها رابووری بوو، وه‌ختا بالیۆزێ ئه‌مه‌ریكایێ یێ ئیراقێ ماسیۆ تۆله‌ر و كونسلێ ئه‌مه‌ریكایێ یێ باشوورێ كوردستانێ رۆب واله‌ر، سه‌ره‌دانا هه‌ڤسه‌رۆكێن ئێكه‌تیێ كری، بالیۆزێ ئه‌مه‌ریكایێ په‌یامه‌كا پر زه‌لال یا ده‌وله‌تا خوه ب هه‌ڤسه‌رۆكێن ئێكه‌تیێ دا و ژ وان را گۆت: «ئێدی ده‌م هاتییه هوون ده‌ست ژ ئیرانێ به‌رده‌ن، ژ به‌ر كو ئیرانێ ل دژی به‌رژه‌وه‌ندیێن ئه‌مه‌ریكایێ ل ده‌ڤه‌رێ كار دكه‌ت».
ب نێزیكبوونا خوه ژ ئیرانێ، ئێكه‌تیێ هێلێن سۆر یێن ئه‌مه‌ریكایێ به‌زاندن، پشتگرییا ئێكه‌تیێ بۆ سیاسه‌تا په‌كه‌كێ و حه‌شدا شه‌عبی ل شه‌نگالێ و ئاسته‌نگكرنا وێ یا نه‌راسته راست بۆ رێككه‌فتنا شه‌نگالێ میناكێن زیندی نه، ژ به‌ر كو ئه‌ڤ پشتگری وه‌ك پشتگری بۆ «میحوه‌رێ مقاوه‌مێ» یێ ئیرانێ ل ده‌ڤه‌رێ دهێته هه‌ژمارتن.
ب رۆژ زه‌لامێ ئیرانێ و ب شه‌ڤ یێ ئه‌مه‌ریكایێ یه
ئێكه‌تیێ نه‌ڤییا تفاقا خوه یا دگه‌ل ئیرانێ ب داوی بینیت و هه‌ڤده‌م نه‌ڤییا ئه‌مه‌ریكایێ ژی زێده‌تر ژ خوه عاجز بكه‌ت، لاهورێ جه‌نگی ب هێڤی بوو ب رۆژ بۆ ئیرانێ و ب شه‌ڤ بۆ ئه‌مه‌ریكایێ كار بكه‌ت.
ئه‌مه‌ریكایێ ب مه‌به‌ست مژارا سوله‌یمانی ئینا پێش و ناڤێ دژه تیرۆرا رۆرا ئێكه‌تیێ ئیفشا كر، د راپۆرتێ دا گه‌له‌ك ب دیقه‌ت به‌حسا ئه‌ندامێ دژه تیرۆرا ئێكه‌تیێ كرییه، كانێ ب چ ئاوایی پا‌رچه‌یه‌كا گوشتێ له‌شێ سوله‌یمانی بۆ ئامه‌ریكییان برییه، ئه‌ڤ وورده‌كارییه ژ بۆ ئیتسفزازا ئیرانێ هاتییه ئیفشا كر، تشتێ كو ئه‌مه‌ریكایێ ڤیایی ب وێ وورده‌كاریێ بێژیته ئیرانێ ئه‌ڤه‌یه: «راسته گوهێ راستێ یێ لاهور د ده‌ستێ هه‌وه دا یه، لێ به‌لێ ڤێ یه‌كێ ژی باش بزانن كو گوهێ وی یێ چه‌پێ ژی د ده‌ستێ مه دا یه و هه‌ر گاڤا مه بڤێت ئه‌م دشێین وی گوهی بكێشین».
