ئەندامێ کۆمیتەیا رێڤەبەر یا پەکەکێ، موراد قارایلان دوهـی رۆژا شەمبی 15/5/2021 بەشداری كۆمبوونا «کۆمخەباتا هەلوەستا نەتەوی» بوو و تێدا باس ل ئۆپەراسیۆنا ترکیێ ل سەر وان ناڤچەیێن باشوورێ کوردستانێ کر کو پەکەکە تێدا هەنە.
موراد قارایلان وەک هەر جار ئەڤ هێرش ب پیلانه‌كا ناڤنەتەوی دا ناساندن و راگه‌هاند کو ئەڤ هێرش بێ هێزێن ناڤدەولەتی ناهێنه ئه‌نجام دان.
قارایلان دا خویا کرن کو چەکدارێن پەکەکێ 20 رۆژن ل بەر خوە دده‌ن، لێ بەلێ ب چ ئاوایی باس ل دەستکەفتیێن وێ بەرخوەدانێ نەکرن، باس ل وان جهان ژی نەکر یێن د دەما ڤان 20 رۆژان دا پەکەکێ ب دەست ترکیێ ڤە بەرداین و پاشڤەکێشاین، هه‌روه‌ها باس ل چ یەک ژ وان گران نه‌كر یێن کو داینە دەست ترکیێ کو وان جارەکا دی شیا بیت ب شەر ژ ترکیێ بستینن.
قارایلان باس ل ده‌ڤه‌رێن شەر لێ هەی کر و ل سەر نه‌خشێ ئەو ده‌ڤه‌ر دەست نیشان کرن، وی باس ل ده‌ڤه‌رێن مەتینا، زاپ و ئاڤا شین کر و جهێن پەکەکە تێدا هەی ب ئاوایەکێ روهن و ئاشكرا دانانه بەرچاڤێن هەر کەسه‌كی، ئەڤ کاره ژ بۆ کەسەکی کو هند ژ ژیانا خوە د مه‌یدانێن شەری دا دەرباس کربیت تشتەکێ پر ب کێماسییە، ژ بەر کو ئەڤ یەک دبیته پێدانا ئاگاهییان ب دوژمنی و ئاشكرا کرنا نوقتەیێن چەکدارێن خوە بۆ دوژمنی، ب ڤێ یەکێ ل شوونا دوژمن ب دروون و بالەفر و سیخۆران بخوازیت ڤان ئاگاهییان ب دەست بێخیت، قارایلان ل سەر سێنییا زێری پێشکێشی وان کرن.
نه‌خشه‌یا قارایلان و وێنەیێن مۆبایلێن جوانێن باشوور
قارایلان باس ل جهێن کو نها شەر تێدا هەی کر و راگه‌هاند ئەڤه دەمێ 20 رۆژانە دەولەتا ترکیێ دڤێت پێشدا بهێت لێ نه‌شێت، وی باس ل وان گران کر کو نها شەر تێدایه، لێ بەلێ ب چ ئاوایی باس ل گرێ دێرسم، گرێ شەهید چیا، گرێ بیێ، گرێ لەزگین، گرێ شەهیدان، چەپەرێ شێخا، گرێ سۆر، گرێ شەهید جاهید، گرێ هەلیکۆپتەر و ب سەدان گر و جهێن دی نەکر کو هەر یەک ژ وان ب ناڤێ یەک ژ گەریلایێن جانێ خوە ژ دەست دایی ناڤ کرینە.
ئەڤ یەک د دەمەکی دا یە کو پێش نها هه‌ژماره‌كا زۆر ژ جوانێن باشوور ژ ئالیێ پەکەکێ ڤە ل سەر وێنەگرتنا خوەزایێ یان ژی کەتنا ناڤا چیایێن کو پەکەکە ب ناڤچەیێن عەسکەری ب ناڤ دکەت هاتینە گرتن و هنده‌ك ژ وان کوشتینە و بێ روومەتی ب هنده‌كێن دی ژ وان کرینە.
جوانێ هەری داوی ب ڤێ یەکێ هاتییە تاوانبار کرن و پشترە هاتییە کوشتن جۆتیار موحسین یێ خەلکێ گوندێ سیارێ بوو کو پەکەکێ ئەو ب سووچا دانانا ئاموورێن جی پی ئێس دەستەسەر کربوو.
