سەندیکایا پاریزەرێن دیاربەکرێ راپۆرتا ئێریشا نژادپەرەستی یا سەر مالباتا کورد ئاشکەرا کر

سەندیکایا پاریزەرێن دیاربەکرێ راپۆرتا ئێریشا نژادپەرەستی یا سەر مالباتا کورد ئاشکەرا کر

 بارۆیا دیاربەکرێ ل گەل کۆمەلەیا مافێن مرۆڤان یا مێرسینێ، کۆمەلەیا مافناسان تایێ مێرسینێ و تایێ مازلومدەرێ ئەدەنێ راپۆرتا دەربارێ ھورگلیێن ئێریشا سەر مالباتا ھەولێری ل باژێرێ مێرسینێ ب داخویانیەکا رۆژنامەڤانی ئاشکەرا کر.

د راپۆرتێ دا دهێتە گۆتن کو مالباتا کورد راستی تاوانا نەفرەتێ ھاتیە و ل گۆر بەیانا سەرۆکێ سەندیکایا پارێزەرێن دیاربەکرێ ناھیت ئەرەن ژی رێڤەبەرێ ئەولەهیا ناڤچەیا ئاناموورا مێرسینێ بوویەر وەکی “بوویەرەکا ترافیکێ” نیشان دایە.

دەربارێ بوویەرێ دا ل سەر ئیفادەیا کەسێ ئێریش ل سەر هاتیە کرن ب ناڤێ موشتاق مەحموود کەرەم کو د ئێریشێ دا بریندار بووبوو، ھاتە ئاشکەراکرن: “کەسێ کو سکالا تۆمار کریە، د ئیفادەیا خوە دا دیار کریە کو ب بەرا ژ لایێ پشتا سەرێ وی ھاتیە لێدان، پشتی کو ل ئەردی کەتیە، ئێریشکاران خواستیە وی د کەندالی دا باڤێژن خارێ، ژ بەر کو ترکی باش نزانیت و ئاگەهـ ژ خوە نەمابوو، ژ گەف و سڤکاتیێن کو لێ ھاتنە کرن، تەنێ گۆتنێن ئەڤ دەر ئاخا ئاناتۆلیایە، ئەڤ دەر ترکیایە، تو ل ئاخا مە چ دکەی” فێم کریە.”

د بەشەکێ راپۆرتێ دا ل سەر ئیفادەیێن شاھدان دهێتە گۆتن، موشتاق مەحموود و 3 زارۆکێن خوە د دەما کو د ترۆمبێلا خوە دا دچوون پێشیا وان ژ لایێ وان کەسێن ئێریش کرنە ڤە ھاتیە گرتن؛ ب بەرا ل سەرێ وان دانە، ھاتنە لێدان، خواستنە د کەندالی دا پاڤیژنە خارێ و پشتی کو ئێریشکاران گومان کریە ئەو مریە ژ جھێ بوویەرێ دوور کەتنە و چوونە.

ل گۆری شاھدێ بوویەرێ دایە خویاکرن، ب سەدەما کو کورد یان ژی عەرەبن سڤکاتی ب وان ھاتیە کرن و ھەروھا لگەل کو جھێ بوویەرێ ھەرێما جەندەرمەیایە ژی رێڤەبەرێ ئەولەهیا ئاناموورێ دەرڤەیی ئەرکا خوە تەڤگەریایە و ب پۆلیسێن خوە دەستوەردانا بوویەرێ کریە کو ھەڤدیتنێن بێی بەشداریا پارێزەران ھاتنە کرن.

ھەروھا د راپۆرتێ دا دهێتە ئاشکەراکرن کو رێڤەبەرێ ئەولەهیێ ژ گۆتیە شاندێ سەندیکایا پارێزەرێن دیاربەکرێ، بوویەرەکا ترافیکێ یا ب زیانا مادییە و دێ دادوەر تاوانێ دیار کەت و ئیفادەیا شاھدی ژی چ ئیعتبار بۆ نینە.

ئەنجام و تەسبیتێن راپۆرتا سەندیکایا پاریزەرێن دیاربەکرێ

– موشتاق مەحموود ە خێزانا وی راستی گۆتنێن نژادپەرەستی و ئێریشا فیزیکی ھاتنە.

– موشتاق مەحموود و خێزانا وی ژ بەر کو ژ ھەرێما کوردستانێ و کورد بوونە راستی تاوانا نەفرەتێ ھاتنە.

– دڤێت دەربارێ رێڤەبەرێ ئەمنیەتا ئانامورێ، قایمەقام و بەرپرسێن ئەمنی دا لێپرسین بهتە دەستپێکرن کو هەرچەندە نە د ئەرکێ وان دا بوویە، ھەول دانە ل گەل مالباتێ باخڤن و ئاراستە بکەن.

– دڤێت مادەیا 122 یا یاسایا جەزایا ترکیا بهێتە گوھارتن و سەبارەت سڤکاتی و گەفێن ل دژی ناسنامەیێن جیاواز یاسایەک بهێتە ئامادەکرن.

– دڤێت ترکیا ب رێک و پێک پابەندی ھەموو وان رێکەفتنێن ناڤخوە و ناڤدەولەتی ببیت کو ئیمزا کرنە و داراز و ئیدارە پابەندی وان خالان ببن کو ھاتنە دەستنیشانکرن.

پوستێن ھەمان بەش