مەزلووم عەبدی: دڤێت رێڤەبەریا خوەسەر د دانا بریاران دا زەلال بیت

فەرماندارێ گشتی یێ ھێزێن سووریایا دەمۆکراتیک (ھەسەدێ) مەزلووم عەبدی راگھاند، دڤێت رێڤەبەریا خوەسەر د دان و گۆتووبێژکرنا بریاران دا زەلال بیت.

فەرماندارێ گشتی یێ ھەسەدێ مەزلووم عەبدی ئیرۆ 20/5/2021ێ دەربارێ نەرازیبوونا خەلکێ ژ بریارا 119ێ یا گرانکرنا بهایێ سۆتەمەنیێ و ھلوەشاندنا وێ بریارێ ژ لایێ رێڤەبەریا خوەسەر ڤە، ل سەر حەسابا خوەیا تویتەرێ گۆت: “ھەڤکاریا ئاڤاکەرا د چەند رۆژێن داوی دا یا مە د ناڤبەرا رێڤەبەریا خوەسەر و گەل دا دیتی، تەکەز دکەت کو ئەم ل سەر ریا راستین ژ بۆ ئاڤاکرنا پاشەرۆژەکا باشتر.”

ھەروھا عەبدی گۆت: “ئەم تێ دگەھین کو رێڤەبەری ھەول ددەت گرانیێ بدەتە ھندەک خزمەتگۆزاریێن لەزگین یێن وەکو کارەبا، ئاڤ، پەروەردە و تەندورستیێ، لێ پێویستە د مژارا دان و گۆتووبێژکرنا بریاران دا زەلال بیت.”

مەزلووم عەبدی د بەشەکێ دی یێ داخویانیا خوە دەربارێ خوەپێشاندانێن ل دژی بریارا 119ێ هاتیە ئەنجامدان دا دەستنیشان کر: “ئەم ژ گەلێ خوە ھشیاریێ دخوازین، ژ بەر کو ھندەک شانەیێن نهێنی ھەنە ھەول ددەن ل باوەری و ئارامیا ناڤچەیێ بدەن.”

رێڤەبەریا خوەسەر رۆژا 17ێ گولانێ ب بریارا 119ێ بهایێ سۆتەمەنیێ بلند کر، ڤێ یەکێ ژی کارڤەدانێن نەرازیبوونێ یێن خەلکێ ل دووڤ خوە ئانین و وەلاتی ل قامشلۆ و ھندەک گوند و باژارۆکێن دی دەرکەتنە خوەپێشاندانان و نەرازیبوونا خوە ل دژی وێ بریارێ نیشان دان.

د ئەنجاما نەرازیبوون و خوەپێشاندانان دا، رێڤەبەریا خوەسەر دوھی د داخویانیەکێ دا، بریارا 119 ھەلوەشاند و بهایێ سۆتەمەنیێ وەک بەرێ لێکر.