بەرپرسەکێ پەکەکێ دبێژیت، “ب ھزاران” چەکدارێن پەکەکێ ل رۆژئاڤایێ کوردستانێ ھەنە.
ھەڤسەرۆکێ کەجەکێ جەمیل بایک ژ بۆ مەدیایا پەکەکێ ئاخڤت و راگهاند، ل جەم پەکەکێ چ جوداهیەک د ناڤبەرا باکورێ کوردستانێ و رۆژئاڤایێ کوردستانێ دا نینە ژ بەر وێ ژی ب ھزاران گەریلایێن وان ل رۆژئاڤا شەری دکەن.
گۆتنێن جەمیل بایک بەرۆڤاژی گۆتن و داخویانیێن رێڤەبەریا رۆژئاڤایە کو دبێژیت هیچ پێوەندیەکا وان د گەل پەکەکێ دا نینە و هیچ چەکدارەکێ پەکەکێ ژی ل رۆژئاڤا نینە. گۆتنێن جەمیل بایک تۆھمەتێن ترکیا ل سەر رۆژئاڤایێ کوردستانێ پشتراست دکەت.
جەمیل بایک ھەر وھا گۆتیە، ئاپۆ و پەکەکە وەک نرخەکێ د ناڤ دل و ھناڤێن خەلکێ رۆژئاڤایێ کوردستانێ دا جیھ گرتینە و دێ حەتا حەتایی مینن ژی. ژ خوە ل دێرکێ حەتا حەلەبێ، خەلکێ رۆژئاڤا نیشان ددەن کو چەند گرێدایی ئاپۆ نە.
ئەڤ گۆتنێن جەمیل بایک رێڤەبەریا رۆژئاڤا تێخیتە تەنگاسیێ ل بەرامبەر ترکیا. ژ بەر کو رێڤەبەریا رۆژئاڤا، ھەر گاڤا کو ترکیا دبێژیت یەپەگە ھەمان پەکەکەیە، وێ یەکێ رەد دکەت و دبێژیت، هیچ پەیوەندیا مە د گەل پەکەکێ دا نینە.
