د تۆپبارانا ئیرۆ یا ده‌وله‌تا تركیێ ده ل باشوورێ كوردستانێ كو پێگه‌هێن رێخستنا په‌كه‌كێ كرنه ئارمانج، گه‌نجه‌كێ دهۆكێ بریندار بوو.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا دووشه‌می 25/5/2021ێ، تۆپخانه‌یێن ده‌وله‌تا تركیێ لڤ و ته‌ڤگه‌رێن چه‌كدارێن په‌كه‌كێ ل ده‌ڤه‌را به‌رواری بالا كرن ئارمانج و ب ڤێ سه‌ده‌مێ گه‌نجه‌كێ 21 سال بریندار بوویه.
ده‌ست نیشان كر، ده‌وله‌تا تركیێ لڤینا چه‌كدارێن په‌كه‌كێ ل گوندێ دێشێشێ یێ ده‌ڤه‌را به‌رواری بالا ئارمانج گرتن و ب ڤێ سه‌ده‌مێ گه‌نجێ ب ناڤێ «باوه‌ر ئه‌حمه‌د محه‌مه‌د تاهر» كو ژ وه‌لاتیێن گوندێ دێشێشێ یه بریندار بوویه.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئه‌ڤ تۆپباران ل ده‌مژمێر 11:30ێ به‌ری نیڤرۆژێ پێكهاتییه.
رێخستنا په‌كه‌كێ ژ بۆ كو چه‌كدارێن خوه ژ ئێریشێن ده‌وله‌تا تركیێ بپارێزیت، لڤینا چه‌كدارێن خوه خستییه ناڤا گوند و دۆربه‌را باژێران، ب ڤێ سه‌ده‌مێ به‌رده‌وام زیانێن جانی ب خه‌لكێ گوندان دكه‌ڤن ب تایبه‌ت یێن سینۆرێ پارێزگه‌ها دهۆكێ.
