په‌كه‌كه‌ خه‌لكێ گوندان وه‌كه‌ مه‌رتال بۆ خوه‌ ب كار دئینیت

چه‌كدارێن په‌كه‌كێ ژ بۆ كو خوه‌ ژ هێرشێن ده‌وله‌تا تركیێ بپارێزین، لڤ و ته‌ڤگه‌رێن خوه‌ ئێخستنه‌ ناڤا گوند و دۆربه‌را باژارۆكان، په‌كه‌كه‌ ڤێ یه‌كێ دكه‌ت ژ بۆ كو خه‌لكێ گوندان ژ بۆی وان ببن مه‌رتال.

ئیرۆ رۆژا سێشه‌مبی 1/6/2021ێ، ئارته‌شا تركیێ ئاقارێ گوندێ هروورێ ل ده‌ڤه‌را به‌رواری بالا، ل باشوورێ كوردستانێ تۆپباران كر، هێرشێ لڤ و ته‌ڤگه‌رێن چه‌كدارێن په‌كه‌كێ كرنه‌ ئارمانج، لێ به‌لێ ب ڤێ سه‌ده‌مێ وه‌لاتییه‌كێ گوندێ هروورێ بریندار كه‌تییه‌.

چاڤكانیێن پێگه‌ها مه‌ ل باشوورێ كورستانێ ئه‌شكه‌ره‌ كر، ئه‌ڤ هێرش ل ده‌مژمێر 11:20 به‌ری نیڤرۆژێ پێكهاتییه‌ و كه‌سێ كو بریندار كه‌تی، ب ناڤێ ره‌مه‌زان عه‌لی عه‌بدولره‌حمان تێ ناس كرن و ته‌مه‌نا وی 55 سالن.

رێخستنا په‌كه‌كێ ژ پاش دژواربوونا هێرشێن تركیێ، لڤ و ته‌ڤگه‌رێن چه‌كدارێن خوه‌ ئێخستنه‌ ناڤا گوندان، ژ بۆ كو خه‌لكێ گوندان ژ بۆ وان ببن مه‌رتال و نه‌كه‌ڤن به‌ر هێرشان، ب ڤێ سه‌ده‌مێ ژ سالا رابووری پێتری 20 سڤیل كو ته‌ڤ خه‌لكێ گوندێن باشوورێ وه‌لاتن، شه‌هید و بریندار كه‌تنه‌.