پشتی کو ل ھەرێما منبجێ کو پرانیا روونشتڤانێن وێ عەرەبن و د بن دەستهلاتا رێڤەبەریا خوەسەر دایە ژ بەر نەبوونا خزمەتگوزاریان خوەپێشاندان ھاتنە کرن و 4 کەس ژی ھاتنە کوشتن، رێڤەبەریێن سڤیل و مەجلیسا لەشکەری داخویانیەک بەلاڤ کر.
فەرماندارێ گشتی یێ مەجلیسا لەشکەری یا منبجێ محەمەد ئەبوو عادل د داخویانیا کو نوونەرێن رێڤەبەریا سڤیلا منبجێ، رووسپیێن عەشیرەتێن ھەرێمێ و فەرمانداریا مەجلیسا لەشکەری یا منبجێ تێدا بەشدار بوون 3 بریار ئەشکەرە کرن.
د داخویانیێ دا ھاتە گۆتن، “منبج و گوندەوارێن وێ د شەرت و مەرجێن حەساس را دەرباس دبیت کو دڤێت ھەموو ب ئەرکێن خوەیێن ئەخلاقی و مرۆڤی ل ھەمبەری خوینا شەھیدان و ئەولەھیا منبجێ و خەلکێ رابن. لێ مخابن د 2 رۆژێن داویێ دا بوویەرێن ب ئێش رووی دان کو د ئەنجامێ دا خەلکێ مەیێ کو بانگا داخوازێن خوەیێن رەوا دکرن خۆپێشاندان کر و هن ژ وان بریندار بوون.”
د بەردەوامیێ دا وەھا ھاتە گۆتن: “ل گۆری جڤینا مە یا دگەل ریهسپیێن عەشیرەتێن منبجێ و ل گۆری داخواز و پێشنیارێن وان و ژ بۆ پاراستنا ئەولەھیا باژێری و ژیانا ھەڤبەشا خەلکی و رێگرتنا ل پێشیا فتنەیێ، ئەم ل سەر ڤان خالان رێکەفتین:
1- راوەستاندنا چالاکیا پێکئانینا ئەرکا خوەپاراستنێ ل منبجێ و گوندەوارێن وێ کو دڤێت جارەکا دن د بەر چاڤان را بهێتە دەرباسکرن.
2- دڤێت ھەموو کەسێن د خۆپێشاندانێن داویێ دا ھاتنە گرتن، سەربەست بهێنە بەردان.
3- دڤێت کۆمیتەیەکا لێپرسینێ بهێتە ئاڤاکرن دا کو لێکۆلینێ ل سەر ئامارێن گولـلەباراندنێ بکەت و حەساب ژ کەسێن کو پەیوەندی ب بوویەرێ ڤە ھەنە، بهێتە وەرگرتن.”
