سیاسەتمەدارێن ھەرێما کوردستانێ دەربارێ ئێریشا پەکەکێ بۆ سەر سەنگەرێن پێشمەرگە دبێژن پەکەکە رۆلا داعش و حەشدا شەعبی یا ل دژی پێشمەرگە وەرگرتیە و خیانەتکارێن 16ێ ئۆکتۆبەرا 2017ێ ژی ب شەھیدبوونا پێشمەرگەیان کەیفخوەشن.
ئیرۆ رۆژا شەمبی 5/6/2021ێ وەزارەتا پێشمەرگەیا ھەرێما کوردستانێ راگھاند؛ ژ لایێ ھێزەکا پەکەکێ ڤە کەمینەک بۆ پێشمەرگە ھاتیە دانان و د ئەنجامێ دا پێنج پێشمەرگە شەھید بوون و 6 پێشمەرگە ژی بریندار بوون.
ھەروھا د داخویانیێ دا ھاتیە راگھاندن ژی پەکەکێ د وێ ئێریشێ دا چەکێن گران و سڤک بکارئانینە و ئارمانجا پێشمەرگە ل ھەرێمێ سەقامگیری و پارستنا ئاساییشێ یە.
سیاسەتمەدار و ئاکادەمیسیەنێن ھەرێما کوردستانێ دبێژن چاوا داعش و حەشدێ ئێریشی ھەرێما کوردستانێ کر و پێشمەرگە ل ھەمبەر وان کەت سەنگەران، پەکەکە ژی رۆلا وان دگریت و ئەجیندایێن وەلاتێن جیران جێبەجێ دکەت.
ئاکادمیسیەنێن کورد راگهاند پەکەکە ژ بۆ لاوازکرنا ھەرێما کوردستانێ کو د ئەنجاما خوینا ب ھەزاران شەھید ئەنفال و کیمیابارانان ھاتیە ئاڤاکرن خەباتێ دکەت.
ئاکادەمسیەن و شیرۆڤەکارێ سیاسی در.مەدحەت سلێمان، ژ بۆی باس نیۆزێ ئاخفت و راگھاند، یا پەکەکە ل بەرامبەر پێشمەرگە دکەت ھەمان کریار و قۆناغێن ئێریشێن داعش و حەشدا شەعبی نە بەرامبەر پێشمەرگە. ھەروھا در. مەدحەت سلێمان دبێژیت: “ھەمان ئەجیندایا ل پشت داعش و حەشدا شەعبی بوو ژ بۆ ئێریشا سەر پێشمەرگە ل پشت پەکەکێ یە ژی و پەکەکە ژ داعشێ ژ بۆ ھەرێما کوردستانێ ترسناکترە. چونکە دەما داعش دورست بووی وەلاتان قەبوول نەکر و ھەڤپەیمانیا ناڤدەولەتی ئاڤاکرن ژ بۆ ژناڤبرنا داعشێ. لێبەلێ پەکەکە ھێزەکە کو جلووبەرگێ کوردی ل بەرە کریە و ھەر شەرەکێ لگەل وێ وەکو شەرێ براکوژی دهێتە وەسفکرن. مەدیایا ناڤخوەیا ھەرێما کوردستانێ کو چاوا د شەرێ ل دژی داعشێ و حەشدا شەعبی دا مۆرالێن پێشمەرگەیان و خەلکێ ھەرێما کوردستانێ دادخستن، نھا ھان ددەن پەکەکە ئێریشی ھەرێما کوردستانێ و سەنگەرێن پێشمەرگەیێن ھەرێما کوردستانێ بکەت و خیانەتکارێن 16ێ ئۆکتۆبەرا 2017ێ ژی بەشەکن ژ وان ئێریشێن پەکەکێ و ئەجیندایێن وەلاتێن ئیقلیمی جێبەجێ دکەن.”
ھەروھا ئاکادەمسیەن ل زانینگەھا دوھۆکێ شێرزاد زەکەریا ژی ژ بۆی باس نیوزێ ئاخڤت و دا زانین پەکەکە نە ل ھەرێما کوردستانێ و نە ژی ل ئیراقێ نە ھێزەکا یاساییە و هیچ دەستیریەکا وێ یا وەرگرتنا چەکان نینە ل ھەرێما کوردستانێ، لێبەلێ بەردەوامە ژ بۆ دورستکرنا کێشەیان ژ بۆی خەلکێ ھەرێما کوردستانێ و ئێریشی پێشمەرگە دکەت.
ھەروھا شێرزاد زەکەریا ئاماژە ب وێ یەکێ ژی کر ژ بەر ھەبوونا بارەگەھێن پەکەکێ ل ھەرێما زاخۆ حەتا قەندیلێ ب دەھان گوند ڤالابوونە و نە یاسایی یە کو پەکەکە کارێ خوە ل باشوورێ ھەرێما کوردستانێ بکەت و ھەبوونا پەکەکێ باھانەیان ددەتە ئارتێشا ترکیێ کو ھەرێما کوردستانێ ئارمانج بکەت.
ل ئالیێ دی پارلەمەنتەر و ئەندامێ لیژنەیا ناڤخوەیێ یا پارلەمەنتۆیا کوردستانێ نزار سورچی ژی دبێژیت ئێریشا پەکەکێ بۆ سەر پێشمەرگە ئێریشەک بوو بۆ سەر ھەموو ھەرێما کوردستانێ و وەکو لیژنەیا ناڤخوە وێ ئێریشێ ب تووندی شەرمەزار دکەن.
ھەروھا نزار سوورچی دبێژیت ئەو داخوازێ ژ سەرۆکاتیا پارلەمەنتۆیێ دکەن وێ ئێریشێ شەرمەزار بکەت و ھەموو فراکسیۆنێن ھەرێما کوردستانێ بەرامبەر وان ئێریشێن پەکەکێ ھەلوێستێ وەربگرن و داخوازێ ژ پەکەکێ بکەن ژ ناڤا خاکا ھەرێما کوردستانێ دەرکەڤیت و دەستێ خوە درێژی خوینا کوردان و پێشمەرگایان نەکەت داکو جارەکا دی کارەستێن وھا پێک نەیێن.
