ئەندامەکێ سەرکرداتیا پەدەکێ دبێژیت، پەکەکە ژ ئالیێ وان وەلاتێن کو ناخوازن کوردستان ئارام بمینیت، بۆ خرابکاریێ ھاتیە ئەرکدارکرن و ئەو تشتێن کو دکەت ژی، بۆ ڤەشارتنا روورەشیا خوە دکەت.
ئەندامێ سەرکردەتیا پەدەکێ، عەلی عەونی راگهاند، پەکەکە ژ ئالیێ وان وەلاتێن ھەرێمی یێن کو ناخوازن کوردستانێ ئارام بمینیت، ھاتیە ئەرکدارکرن دا کو خرابکاریێ بکەت. پەکەکە دارێ دەستێ وانە و ژ بۆی خوە بکار تینن. ئەگەر ئارامیا کوردستانێ خراب ببیت د سوودا هیچ کوردەکێ دا نینە.
عەلی عەونی ھەر وەھا گۆت، ئەو کارێن کو پەکەک دکەت بۆ ڤەشارتنا روورەشی و بنکەتنا خوە دکەت.
ب گۆتنا وی ئەندامێ سەرکردەتیا پەدەکێ، خەلک ناخوازیت ئالۆزی ل ھەرێما کوردستانێ چێببیت ژ بەر کو خزمەتا دژمنان دکەت. ھەر کوردەکێ پیچەکێ خوەدان ھەستا کوردنیێ بیت باش ڤان تشتان دبینیت.
عەلی عەونی ئانی زمان ژی، پەکەکە ل باکوورێ کوردستانێ بن کەتیە. ئەو ھێزەکن بۆ لێدانا ھەر چار پارچەیێن کوردستانێ چێبوونە، پەکەکە بۆ ئازادیا کوردان کار ناکەت. بەلکو د بن ناڤێ کوردنیێ دا دژبەریا کوردان دکەن.
ل سەر پشتەڤانیکرنا پەکەکێ ژی عەلی عەونی گۆت، ئەوێن کو پشتەڤانیا پەکەکێ دکەن، ل چۆکا خوە ددەن. ئەو ژ کەربا پەدەکێ ڤێ یەکێ دکەن نە ژ بەر حەژێکرنا پەکەکێ. ئەو ژی دێ رۆژەکێ تووشی پەکەکێ ببن.
وی ئەندامێ سەرکردەتیا پەدەکێ بانگ ل ھەموو کەسایەتی و پارتیێن سیاسی یێن کوردستانێ کر ل ھەمبەر پەکەکێ یەکدەنگ بن و ببێژنێ ژ ڤێرە دەرکەڤە! مەیدانا خەباتا وە باکورێ کوردستانێ یە. ئەگەر پیچەک ھەستێ کوردینیێ د ناڤ پەکەکێ دا مابیت دێ ڤەگەریتە باکور و ل وێرێ خەباتێ کەت.
