تەڤگەرا دەمۆکراتیکا کوردستانێ-تەڤگەر ل دۆر ئێریشا چەکدارێن پەکەکێ ل سەر پێشمەرگەیێن کوردستانێ کو دوهـ رۆژا شەمی ل ئامێدیێ پێک هات، داخویانیەک پارڤەکر و تێدا ئەڤ کارێ پەکەکێ ب توندی شەرمەزار کر.

تەڤگەرا دەمۆکراتیکا کوردستانێ-تەڤگەرێ، هەر وەها راگهاند ئەڤ کارێن پەکەێ راستە راست دکەڤن خزمەتا دەولەتێن داگیرکەر.

داخویانی وها یە:

ئەم ئێریشا سەر پێشمەرگەیێن کوردستانێ شەرمەزار دکین

کریارێن پەکەکێ ل کوردستانا باشوور و داگیرکرنا کوردستانا  باشوور ژ ئالییێ دەولەتا ترکییێ ڤە ھەر کو دچیت رەوشا کوردستانێ ئالۆزتر دکەت.

ئەم تەڤگەرا دەمۆکراتیکا کوردستانێ (تەڤگەر)، سەرساخیێ ژ حکوومەتا ھەرێما کوردستانێ، ژ وەزارەتا پێشمەرگە و ژ مالباتێن ڤان شەھیدان را دخوازین. ھێڤیدارین ژ یەزدانێ دلۆڤان وان ببەخشینیت و ب بحەشتا خوە شاد بکەت. ئەم د لەزترین دەم دا خوەشیێ ژ پێشمەرگەیێن بریندار را دخوازین.

ژ ئالییەکێ ڤە زۆردارییا پەکەکێ و ژ ئالییێ دن ڤە ئێریشێن لەشکەری یێن ترکیێ سەرانسەرێ  ناڤچەیێن سینۆری یێن کوردستانا باشوور بەر ب رووخاندن و کاڤلکرنێ دا دبەت. گوند ب تەڤایی ڤالا دبن، کورد ژ جیھ و وارێن خوە کۆچبەر دبن، ب ئاوایەک پەریشان، بێ دەبار ل ناڤچەیێن دن بەلاڤ دبن.

دەولەتا فەدەرال یا کوردستانێ،  ژ بەر ئەگەرێن پێشیلێنەگرتنا ئێریشێن پەکەکێ ل دژی پێشمەرگەیێن کوردستانێ، تەڤی ھاوار و فیگانا ڤی خەلکێ ناڤچەیێ ژی ب بێنفرەیی خوە ل ھەمبەر ڤێ مالکمباخییێ رادگریت.

مخابن پەکەکە ھەر کو دچیت جییێ خوە ل ناڤچەیێ فرەھتر دکەت، گوھنادەتە دەستھلاتدارییا کوردستانێ، پێ ل سەروەرییا حکوومەتا کوردستانێ دکەت و د سەر دا ژی ئێریشێن ھێزێن ئەولەکاریا کوردستانێ دکەت.

ئەڤ ژی مەترسییا شەر و پەڤچوونێن ناڤبەرا پەکەکێ و پێشمەرگەیێن کوردستانێ بلندتر دکەت. ڤێ کەمین و ئێریشا داویێ یا پەکەکێ ل دژێ پێشمەرگەیێن کوردستانێ، شەھیدکرنا پێنج  پێشمەرگە و بریندارکرنا شەش  پێشمەرگەیان مەترسی مەزنتر کرییە.

ئەم ڤێ بویەرا مالکمباخ ب دژواری شەرمەزار دکین. ئەڤە کارەکێ روورەشییە، ڤەکری خزمەتا دەولەتێن داگیرکارە. ئەم ھێڤیدارین ئەڤ رەوشا ئالۆز، ئالۆزتر نەبیت، خوینا کوردان ب دەستێن کوردان نەیێتە رژاندن!

ئەم داخواز ژ رایا گشتی، ژ ھێزێن ھەڤپەیمان و دەولەتا ئیراقێ دکین کو دەملدەست ل دژی ڤان ئێریشان ھەلوەستێ وەربگرن، پشتگریا سەروەرییا حکوومەتا ھەرێما کوردستانێ بکەن، رێ ل بەر داگیرکاری و ئێریشێن دەولەتێن داگیرکار بگرن. دا کو پێشییا شەر و پەڤچوونێن ل دژی ھەرێما کوردستانێ بهێتە گرتن. کوردێن ناڤچەیێ  ژی ژ پەریشانییا کۆچبەریێ رزگار ببن و بزیڤرن وارێن خوە، بکاربن ب ئازادی و ئارامی دەبارا زارۆکێن خوە بکەن.

دۆرپێچا سیاسی، ئابۆری و لەشکەری یا کو ل سەر ھەرێما کوردستانا فەدەرال ھەیە، ژ خوە رەوش دژوار کرییە. دژوارترکرنا رەوشا کوردستانێ، تەنێ خزمەتکارییا دەولەتێن داگیرکەرە.

6 تەمووزا 2021

تەڤگەرا دەمۆکراتیکا کوردستان – تەڤگەر