وەزیرێ ناڤخوەیێ ھەرێما کوردستانێ رێبەر ئەحمەد ئەنجاما جڤینا لگەل لژنەیا ناڤخوەیا پارلەمانێ کوردستانێ ئاشکەرا کر.
وەزیرێ ناڤخوەیێ ھەرێما کوردستانێ رێبەر ئەحمەد ئەنجاما جڤینا لگەل لژنەیا ناڤخوەیا پارلەمانێ کوردستانێ ئاشکەرا کر و راگھاند؛ ئەو رەفتارێن پەکەکێ شەرمەزار دکەن و تەڤی کو پەکەکێ دەستیری ژ لایێ حکوومەتا ھەرێما کوردستانێ نینە، ل دەڤەرێن سنۆری و د کووراھیا ئاخا کوردستانێ دا بنپێکرنان دکەن، تشتێ کو ل ھەمبەر پێشمەرگە ئەنجام دای، ناهێتە قەبوولکرن.
رێبەر ئەحمەد د جڤینا چاپەمەنیێ دا راگھاند: “ئەم ئیرۆ لگەل لژنەیا ناڤخوەیا پارلەمانێ کوردستانێ کۆم بووین و دەربارێ یەکەیا پاسەوانی دا ئاخڤتین، کو پەیرەوا وێ دەرچوویە و ل ئەنجوومەنا وەزیرانە، رێنمایێن پێویست ل وەزارەتا ناڤخوە دەرچوونە ژ بۆ رێکخستنا یەکەیا پاسەوانی و دەستبکارکرنا ستافا یەکەیا پاسەوانی ل وەزارەتا ناڤخوە.”
وەزیرێ ناڤخوە ل سەر یەککرنا یەکەیێن پێشمەرگە ئاشکەرا کر کو پارتیا دەمۆکراتا کوردستانێ (پەدەکە) یەکەیا 80 خستیە بن سەرپەرشتیا وەزارەتا پێشمەرگە و گۆت: “ئەم ھێڤی دکەین برایێن مە یێن ل ئێکەتیا نشتمانی یا کوردستانێ (یەنەکە) ژی ڤێ بریارێ بدەن و یەکەیێن 70 ژی بکەنە د ناڤ وەزارەتا پێشمەرگە دا، ئەڤە پرۆسەیەکا ھێسانترە ژ یەکەیا پاسەوانی.”
رێبەر ئەحمەد دیار کر تشتێ کو پەکەکێ ل ھەمبەر پێشمەرگەیان ئەنجام دایی، ناهێتە قەبوولکرن. پێشمەرگە ماف ھەیە کو ل ھەموو جھێن ھەرێما کوردستانێ لڤ و تەڤگەران بکەت.
