جه‌سه‌دێ كچه‌كا باژارێ سه‌قزێ یێ رۆژهلاتا كوردستانێ ل سه‌ر رێیا نێڤبه‌را سه‌قز بۆ سنه تێ دیتن، ئه‌و ژ ئالیێ ده‌زگرێ خوه ڤه هاتییه شه‌وتاندن.
رێخستنا هه‌نگاو یا مافێن مرۆڤان یا رۆژهلاتا كوردستانێ ئه‌شكه‌ره كر، دوهـی رۆژا سێشه‌مبی 8/6/2021ێ، جه‌سه‌دێ كچه‌كا سه‌قزێ ب ناڤێ گولاله شێخی كو ته‌مه‌نێ وێ 26 ساله، ل ناڤچه‌یا ب ناڤێ چاپانا ژێر یا ل سه‌ر رێیا نێڤبه‌را سه‌قز و سنه دا، هاتییه دیتن.
ده‌ست نیشان كر، ئه‌ڤ كچ ژ ئالیێ ده‌زگرێ وێ ڤه هاتییه شه‌وتاندن و جانێ خوه ژ ده‌ست داییه.
گولاله شێخی كچه‌كا باژارێ سه‌قزێ یه، یاسا خواندییه، به‌ری دوو هه‌فتییان ل گه‌ل ده‌زگرتێ خوه یێ ب ناڤێ كه‌یۆمه‌رس زه‌رغامی گه‌شته‌ك كرییه، به‌ری دوو رۆژان، ده‌زگرێ وێ په‌یوه‌ندییا تێله‌فوونی ب مالباتا خوه كرییه و ژ وان را گۆت كو وی گولاله كوشتییه و جه‌سه‌دێ وێ ل نێڤبه‌را سه‌قز و سنه بن ئاخ كرییه و ئه‌و ژی ره‌ڤیایه.
ل گۆری ئاگاهیێن كو هاتینه پارڤه‌كرن، كه‌یۆمه‌رسێ ده‌زگرێ گولالێ، ل گه‌ل هه‌ڤاله‌كێ خوه، گولاله ب په‌نزینێ شه‌وتاندییه و پشتره ل سه‌ر رێیا باژارێ سنه بن ئاخ كرییه، ئه‌و دوو رۆژ بوو هێزێن ئه‌وله‌هیێ دگه‌ریان ژ بۆ كو جه‌سه‌دێ وێ ببینن.
