رێخستنا هه‌نگاو یا مافێن مرۆڤان ژ بۆ ته‌عقیبا چاره‌نڤیسا سمكۆ به‌نه‌فشی كو ده‌ما 57 رۆژانه ل سلێمانیێ هاتییه بێسه‌روشوون كرن، داخوازییه‌كێ ژ هه‌ولێرێ پایته‌ختا باشوورێ كوردستانێ دكه‌ت.
رێخستنا هه‌نگاو یا مافێن مرۆڤان یا رۆژهلاتا كوردستانێ، راپۆره‌ك ل ده‌ربارا كه‌یسا ووندابوونا سمكۆ به‌نه‌فشی كادرۆیێ كۆمه‌لا شۆره‌شگه‌ر یا زه‌حمه‌تكێشێن كوردستانێ كو ل 13 مه‌ها نیسانا ئیسالێ ل سلێمانیێ ووندابوویه، پار ڤه‌كر.
د راپۆرێ دا، رێخستنا هه‌نگاو هه‌ڤدیتن ب محه‌مه‌د به‌نه‌فشی باڤێ سمكۆ و هه‌روه‌ها ژیلا دانشوه‌ر هه‌ڤژینا سمكۆ كرییه، وان ژ بۆی هه‌نگاوێ گۆتنه كو سمكۆ ل سلێمانیێ ژ هێلا هێزه‌كا ب ناڤێ دژه ته‌رۆرا یه‌نه‌كێ ڤه هاتییه ره‌ڤاندن.
ده‌ست نیشان كر وان سه‌ردانا هه‌موو سازیێن ئه‌وله‌هیێ یێن سلێمانیێ كرنه، لێ ده‌ست ڤالا ڤه‌گه‌رین و چ ئاگاهی ل ده‌ربارا چاره‌نڤیسا سمكۆ ب ده‌ست وان نه‌كه‌تنه.
رێخستنا هه‌نگاو د راپۆرا خوه دا داخواز ژ رێخستنێن مافێن مرۆڤان ل باشوورێ كوردستانێ، سازییا دادوه‌ری یا باشوور و هه‌روه‌ها كۆمسیۆنا مافێن مرۆڤان یا ل هه‌ولێرێ كرییه، ته‌عقیبا دۆسییا سمكۆ به‌نه‌فشی بكن ژ بۆ كو ئاگاهی ژ چاره‌نڤیسا وێ بێ زانین.
