پێشمێرگەیێن پاراستنا کوردستانێ دکەن، دکوژن، درەڤینن. لێ ھێژتا ژی دەنگ ژ پارتی و رێخستنێن باکورێ کوردستانێ ویێن ل ئەورۆپا دەرناکەڤیت.
دڤێت کوردێن باکورێ کوردستانێ ڤێ ڤایرۆسێ چارەسەر بکەن. یا نە کا دێ چ هێتە سەرێ وان پێویستە ژ نھا دا حەسابا خوە بکەن. یا راستی دڤێت ل ھەر چار پارچەیێن کوردستانێ و ل سەرانسەرێ ئەورۆپا ل دژی ڤان کریار و بوویەرێن پەکەکێ خوەپێشاندانان پێک بینن.
لێ ھەزار مخابن کو نھا پارتیێن باکورێ کوردستانێ ل ھەمبەر ئێریشێن پەکەکێ یێن ژ بۆنا ژناڤبرنا گەلێ کورد، بێ دەنگن. ل گۆر من ب بەلاڤۆکەکێ بوویەرێن وەھا روورەشکرن، نایێ وێ رامانێ کو “ڤایە ئەم نە بێ ھەلوەستین”. پێویستە د مەدیایێن خوە دا ل سەر ئارمانجا ڤان کریارێن پەکەکێ موناقەشە بهێتە کرن دا کو رەوش زەلال ببیت.
ما گەلۆ تەنێ بێدەنگییا پارتی و رێخستنێن مە نە؟ ھەلبەت نەا. ب سەدان حەتا ب ھەزاران رەوشەنبیر، نڤیسکار، رۆناکبیر، سیاسەتمەدارێن کورد ل باکورێ کوردستانێ و ل ئەورۆپا ھێژتا ژی بێ دەنگن. ئەم بێ دەنگیا وان فێم دکەین. یەک ترسە، دو؛ بەرژەوەندییە…
ئەم باش دزانین کو کلیلکا ئازادی و سەرخوەبوونا وەلاتەکی د دەستێ پارتی و رێخستنان دایە و دەما ئەو ژی بێدەنگێ بن، بێ ھەلوەست بن، نە رێکەفتی بن و ل سەر خەتا نەتەوەیی د بن سەیوانەکێ دا خوە ب رێخستنی نەکەن. ل وی وەلاتی دکاریت گەلەک تۆفان بهێنە سەرێ وان و ھەر تشتەکێ خراب بقەومیت.
نھا تەکنیکێ کار و خەبات ئاسان کرییە. ژ بەر ڤێ ژی ھەر پارتی و سازیێن مە بوونە خوەدیێ خوە و تەلەڤزیۆنا خوە، کۆمەلایا خوە. یانی داکو پێکڤە کار نەکەن، چ پیدڤی بیت وێ دکەن.
دەما رەوشا پارتیان وەھا بیت، ھەلبەت د وەلاتێن وان دا ژی تەڤگەر ل گۆر وان ب رێدکەڤیت. لەورا ژی ئەو رێکەفتنا تەڤگەرێ نابیتە تەڤگەرەکا نەتەوەیی و نابیتە، خوەدانا بریار دانا ل سەر ناڤێ گەل.
ئەم و پارتیێن مە ھەر لۆمان ژ پەکەکێ دکەین و کریارێن وان شەرمەزار دکەین. ھەلبەت ئەڤە ژی راستیە. لێ نە چارەسەرییە. ژ بۆنا چارەسەرکرنا مەسەلێ دڤێت ھەمی پارتی و دەزگەھێن دبێژنە خوە؛ ئەم کورد و کوردستانی نە، د گەل یەک دا بن، ل گەل ھەڤدو بن، داخویانیێن وان یەک بن.
پەکەکە ژی رەوشا حیزب و رێخستنێن مەیێن باکورێ کوردستانێ باش دزانیت، لەورا ترسا وێ چەندێ کو ل باکور دێ هندەک کەس و لایەن ل دژی وان دەرکەڤن نینە. ژ بەر کو ئەو دەر حەلکریە. رۆژئاڤایێ کوردستانێ وێران و بەلاڤ کریە. دەرد و ئێشا وان ل سەر داخوازا داگیرکەران تەنھا مایە تێکبرنا باشوورێ کوردستانێ.
ژ بەر کو ئەم ژی ئەو ژی باش دزانین کو ھەبوونا باشوورێ کوردستانێ ھەبوونا ھەمی کوردانە. لەورا پەکەکە دخوازیت وێ ھەبوونێ ژناڤ ببەت، وێ دەرێ ژی تێک ببەت دا کو کورد نەبنە خوەدیێن خوە و دەولەتەکا سەربخوەیا کوردستانی.
ئەز ب خوە ڤان تەڤلیھەڤیێن پەکەکێ یێن نھا ل باشوورێ کوردستانێ دکەت ب دو خالان گرێ ددەم. یەک؛ ل گۆر من داگیرکەرێن ترک تێگەهشتنە کو داویا پەکەکێ خویا دبیت، لەورا تەڤلھەڤیێ دەردتێخن دا کو زلامێن خوەیێن سەرۆکاتیا پەکەکێ دکەن، د ناڤا ڤێ تەڤلھەڤیێ دا ب ئۆپەراسیۆنەکێ ببەنە ترکیێ.
یا دی ژی لۆزانا دویەمین نێزیک بوویە، رەوش وەھا ددەتە خویاکرن کو د لۆزانا دویەمین دا دێ کوردستانەکا سەربخوە دەرکەڤیت، ئەڤە ژی ژ بۆی داگیرکەران خوەش نابیت. لەورا ل گەل ھەڤدو نە، کارێن خوە ب دەستێ پەکەکێ ددەنە مەشاندن دا کو باشوورێ کوردستانێ ئارام نەبیت.
ژ بەر ڤێ یە کو ئەز دبێژم؛ د ناڤا ڤێ تەڤلھەڤیێ دا دێ داگیرکەرێن ترک ھەمی زەلام، کرێگرتی و نوونەرێن خوەیێن د ناڤا پەکەکێ دا و یێن سەرۆکاتیا وێ دکەن، ببەنە ترکیێ دا کو وان ژ مرن و کوشتنێ خلاس بکەن. وەکو چاوا عەبدوللا بری، دخوازن وان ژی وەھا ببەنە ترکیێ.
دڤێت کورد و ب تایبەتی باشوورێ کوردستانێ هشیار بن و ل ھەمبەر ھەمی ئیستیفزازێن پەکەکێ یەک دەنگ و یەک ھەلوەست بن.
ل باکورێ کوردستانێ و ل سەرانسەرێ ئەورۆپا پێویستە، زووترین دەم دا ئەو دەزگەھ، حیزب و تەڤگەرێن دبێژنە خوە ئەم کورد و کوردستانی نە، پەیوەندیێن خوە ژ پەکەکێ و ھەمی دووڤکێن ب وێ ڤە گرێدایی، ب بەلاڤۆکەکا ھەڤبەش قوت بکەن.
حەتا ل ئەورۆپا و ل باکورێ کوردستانێ ئەڤ نەبیت، دێ ھەر پەکەکە ل سەر ناڤێ وەکو پارتیا کوردا کارکەت و دێ کوشتن و مالوێرانیێ کەت. چارەسەریا ژ ڤێ ڤایرۆسێ خلاس بوون، ل گۆر من نھا ئەڤەیە. سبە دبیت تشتەکی دی ژی بیت…
