ئارام فه‌تحی نڤیسكار و شاعرێ باژارێ مه‌ریوانێ یێ رۆژهلاتا كوردستانێ ژ هێلا هێزێن ئه‌وله‌هییا ئیرانێ ڤه، هات بن چاڤ كرن و ژ بۆی جهه‌كێ نه‌دیار هات ڤه‌گوها‌ستن.
ل گۆری رێخستنا هه‌نگاو یا مافێن مرۆڤان، ل رۆژا پێنجشه‌مبییا رابووری 17/6/2021ێ، هێزێن ئه‌وله‌هییا ئیرانێ ب سه‌ر مالا ئارام فه‌تحی نڤیسكار، شاعیر و چالاكڤانێ مه‌ده‌نی یێ باژارێ مه‌ریوانێ دا گرت و ئه‌و بن چاڤ كرن.
مالباتا فه‌تحی ئه‌شكه‌ره كرنه، كه‌سێن كو فه‌تحی بن چاڤ كری و ل گه‌ل خوه بری، چ به‌لگه‌یه‌كا دادگه‌هێ د گه‌ل دا نه‌بوو.
رێخستنا هه‌نگاوێ ده‌ست نیشان كر، هێزا كو فه‌تحی بن چاڤ كری، مالا وی ژی پشكنین كر و ئالاڤێن دیجیتال یێن وه‌ك كۆمپیۆته‌ر و مۆبایلا فه‌تحی ل گه‌ل خوه برنه.
هێژای گۆتنێ یه، ئارام فه‌تحی ئه‌ڤ نه جارا یه‌كه‌مینه ژ هێلا هێزێن ئه‌وله‌هییا ئیرانێ ڤه تێ بن چاڤ كرن، ل سالێن رابووری ژی چه‌ندین جاران د ڤێ ره‌وشێ دا ده‌رباس بوویه.
