کۆمێن چەکدارێن سووریێ یێن د بن فەرمانا ئارتێشا ترکیا دا کار دکەن، ل سەر بنپێکرنا مافێن مرۆڤان و رەڤاندنا خەلکێ بەردەوامن و د چەند رۆژێن داوی دا 11 کەسێن دی ژی رەڤاندن.
رێخستنا مافێن مرۆڤان یا عەفرینێ راگھاندیە کو کۆما چەکدارا ب ناڤێ پۆلیسێ مەدەنی رۆژا 17ێ خزیرانێ وەلاتیێ ب ناڤێ حوسێن کالۆ ژ گوندێ شێخۆرزێیێ ناڤچەیا بلبلێ رەڤاندیە.
ھەمان کۆمێ رۆژا 14ێ خزیرانێ وەلاتیێ ب ناڤێ محیەدین عەبدوللا داود ژ گوندێ ئەتمانا رەڤاندیە.
ھەروھا کۆما پۆلیسێ لەشکەری رۆژا 16ێ خزیرانێ وەلاتیێ ب ناڤێ زەکەریا خلۆ و کورێ وی عۆسمان ژ باژارێ عەفرینێ رەڤاندن و چارەنڤیسا وان نە دیارە.
ل گوندێ ھێکچێ یێ سەر ب ناڤچەیا جندرێسێ ڤە، گرووپا چەکدار ئەل-وەقاس رۆژا 17ێ خزیرانێ وەلاتیێ ب ناڤێ مستەفا شێخ مستەفا رەڤاندیە.
دیسا کۆما پۆلیسێ لەشکەری رۆژا 17ێ خزیرانێ دو زارۆکێن ب ناڤێ حەنان و مەنان بەتال ژ تاخا مەحموودیێ یا عەفرینێ رەڤاندن و حەتا نھا چارەنڤیسا وان نە دیارە.
ل گوندێ چەقەلێ جوومێ پۆلیسێن لەشکەری رۆژا 17ێ خزیرانێ جوانێ ب ناڤێ سوبحی جەمیل سۆرانی رەڤاند.
رێخستنا مافێن مرۆڤان ل عەفرینێ دایە زانین، پۆلیسێ لەشکەری بەری مەھەکێ 3 کەس ب ناڤێن (مستەفا محەمەد حوسێن، حوسێن مستەفا حوسێن و عزەدین یووسف حوسێن) رەڤاندنە و حەتا نھا چارەنڤیسا وان نە دیارە.
ل گۆری راگھاندنا چالاکڤانێن عەفرینێ، ئارمانجا ئارتێشا ترکیێ و کۆمێن چەکدار ژ رەڤاندنا وەلاتیان ئەوە کو رەوشەکا گەلەک خراپ و مەترسیدار چێبکەن، دا کو وەلاتیێن عەفرینێ ژ خاکا خوە کۆچبەر ببن و پرۆسەیا گوھارتنا دەمۆگرافی ب شێوازەکێ بەرفرەهتر جێبەجێ بکەن.
بەرپرسێ کۆمیتەیا یاسایی یا ئەنەکەسێ رەدوان سیدۆ ژ بۆ K24ێ گۆتبوو، بنپێکرنێن مافێن مرۆڤان و تاوانێن ل عەفرینێ تێنە کرن، دگەھنە ئاستا تاوانا کۆمکوژیێ و دڤێت ئالی و کەسێن ڤان تاوان دکەن بێنە دادگەھکرن و جەزاکرن.
