ئیرۆ بەردەڤکێ رێڤەبەریا بەرەڤانیا شارستانیا پارێزگەھا دوھۆکێ د جڤینەکا چاپەمەنیێ دا ئامارێن بوویەرێن شەش مەھێن بۆری راگەھاندن و ئاشکەرا کر ل ناڤچەیێن چیایی پەکەکە رێگریێ ل تیمێن ئاگرڤەمراندنێ دکە.ت
بەردەڤکێ رێڤەبەریا بەرەڤانیا شارستانیا باژارێ دوھۆکێ بێوار عەبدولعەزیز ئاشکەرا کر: ” د ھەیاما 6 مەھێن بۆری دا 553 بوویەرێن جودا جودا ل سنۆرێ پارێزگەھا دوھۆکێ پێکھاتنە، کو 110 بوویەر شەواتا دارستانان، ژینگە و پووش و گیا بوونە. 8 بوویەرێن شەواتا ناڤ کامپان دا پێکھاتنە و 3 ژ وان ژی د کامپێن کۆچبەران دا پێکھاتنە، ب گشتی 617 چادرێن کۆچبەران شەوتینە. ژبلی زیانەکا مەزن یا دارایی کو گەھەشتیە کۆچبەران، ھەروەھا پارەیەکی زێدە ژی شەوتیە.”
بێوار عەبدولعەزیز ھەروەھا گۆت: “د ھەموو بوویەرێن شەواتێ یێن شەش مەھێن بۆری دا ل دوھۆکێ 7 ملیار و 110 ملیۆن زیان گەھەشتیە ھەموەلاتیان و جیھێن وان. ھەروەھا دو ھەموەلاتیا ژی ژ بەر شەواتێ ژیانا خوە ژ دەست دانە و 16 کەس ژی بریندار بوونە. ھەرواھا 8 ھەموەلاتی خەندقینە و دو کەس ژ ئالیێ خەلکێ ڤە ھاتنە رزگار کرن و 37 ھەموەلاتیێن دی ژی ژ ئالیێ تیمێن مە ڤە ژ بوویەران ھاتنە رزگار کرن کو 21 کەس د ئاڤێن چەم و رووباران دا ھاتنە رزگار کرن.”
بەردەڤکێ رێڤەبەریا بەرەڤانیا شارستانیا باژارێ دوھۆکێ هەروەها گۆت: “د ڤی ھەیامی دا ژ ئالیێ تیمێن بەرەڤانیا شارستانی ڤە 8 گولەیێن ھاوەن و گولەیێن تۆپا ھاتنە پووچ کرن و ھەمان دەمێ دا تیما بالەفرڤانیا دوھۆکێ ژی کو ل گەل مە ھەڤکارن کارینە 10 ھەزار دۆنم پووش و گیایێ کو شەوتیبوو ڤەمرینن. ھەروەھا ھەر د وان شەش مەھان دا 30 ھەزار دۆنم ئەرد و پووش و گیا ل سنۆرێ دوھۆکێ شەوتیە.”
ھەرواھا گۆت: ” د ڤان دەمان دا ژ بەر ھەبوونا بنکەیێن پەکەکێ، بالەفرێن شەری یێن ترکیێ بۆمبەبارانا ناڤچەیێن سینۆری دکەن، دەما تیمێن بەرەڤانیا شارستانیێ ژ بۆ کۆنترۆل کرنا ئاگری بەرێ خوە ددەنە ناڤچەیێ، چەکدارێن پەکەکێ رێگریێ ل کارێ تیمێن مە دکەن، ژ بەر وێ ژی ئەم ناچار دمینین تیمێن خوە ژ وان ناڤچەیان ڤەکێشین.”
