ده‌وله‌تا تركیێ ئیرۆ ئه‌شكه‌ره كر، وان 3 گه‌ریلا ل ده‌ڤه‌را هه‌كاریێ كرنه ئارمانج، هه‌په‌گێ ژی گۆ: مه 5 عه‌سكه‌ر ل مه‌تینایێ جه‌زا كرنه.
ئارتێشا تركیێ و هه‌په‌گه، هه‌ر ل ناڤبه‌را چه‌ند رۆژان ئامارا زرارێن جانی یێن هه‌ڤ پارڤه دكن، لێ به‌لێ هه‌ردوو ئالی راست نابێژن و ڤان ئاگاهییان وه‌كه شه‌ره‌كی ده‌روونی ل دژی هه‌ڤ پارڤه دكن و ته‌نێ دخوازن رایا گشتی ل سه‌ر چێبكن.
ئیرۆ وه‌زاره‌تا پاراستنا نه‌ته‌وی یا تركیێ به‌لاڤ كرییه: د ئۆپه‌راسینه‌كێ ده كو ل شه‌مزینانا ده‌ڤه‌را هه‌كاریێ پێكهاتییه، 3 گه‌ریلا هاتنه ئارمانج گرتن.
هه‌په‌گێ ژی دوهـ رۆژا دووشه‌می ئه‌شكه‌ره كر، گه‌ریلایێن وان 5 عه‌سكه‌ر ل چیایێ مه‌تینا یێ باشوورێ وه‌لات جه‌زا كرنه، هه‌په‌گه ئیدیه‌ما جه‌زاكرنێ ب كار تینه و زه‌لال ناكه كانێ ئه‌ڤ عه‌سكه‌ر هاتنه كوشتن یان بریندار كرن.
ل گۆری مه‌دیا په‌كه‌كێ، رۆژ ناچه نووچه‌یێن جه‌زا كرنا عه‌سكه‌رێن ترك نه‌یێن پارڤه‌كرن، ب ئاوایه‌كی هه‌گه‌ر ئه‌ڤ یێك راست به، پێویسته كێفا هه‌ر كورده‌كی وه‌ره، ژ به‌ر كو نها تركیه بێ عه‌سكه‌ر مابایه!!.
