پارتیا پێشڤەروو و 12 رێخستنێن جڤاکا سڤیل ل سەر کوشتن و ئیشکەنجەکرنا ئەمین عیسا داخوازا لێکۆلینێ کرن

پارتیا پێشڤەروو و 12 رێخستنێن جڤاکا سڤیل ل سەر کوشتن و ئیشکەنجەکرنا ئەمین عیسا داخوازا لێکۆلینێ کرن

ل سەر کوشتن و ئیشکەنجەکرنا ئەمین عیسا، داخوازا پێکانینا کۆمیتەیەکا لێکۆلینێ یا سەربخوە و بێ لایەن ھاتە کرن.

پارتیا پێشڤەروو و 12 رێخستنێن جڤاکا سڤیل و مافێن مرۆڤان، ژ بۆ کوشتن و ئیشکەنجەکرنا ئەمین عیسا، داخوازا پێکانینا کۆمیتەیەکا لێکۆلینێ یا سەربخوە و بێ لایەن کرن.

پارتیا دەمۆکراتا پێشڤەروویا کورد ل سووریێ دیار کر، ژ بۆ کو راستی بهێتە ئاشکەراکرن، دڤێت کۆمیتەیەکا لێکۆلینێ یا سەربخوە و بێ لایەن، ژ کەسێن پسپۆر بهێتە پێکانین و راستیێ ژ بۆ رایا گشتی ئاشکەرا بکەت.

پۆلیتبیرۆیا پارتیا پێشڤەروو دا زانین، ھێزێن ئەولەکاریا ناڤخوەیێن رێڤەبەریا خوەسەر ژ ئەولەکاری و پاراستنا وەلاتیان بەرپرسیارن و دبێژیت، کو “ئەو کارێ ھاتیە کرن، ل دژی ھەموو بوھایێن مرۆڤی و جڤاکییە.”

پارتیا پێشڤەروو دەستنیشان کر، ژ بەر کو راستی نە ھاتیە زەلالکرن، دڤێت کۆمیتەیەکا لێکۆلینێ یا سەربخوە و بێ لایەن بهێتە پێکانین و ئەنجامین لێکۆلینێن خوە ل سەر وی “کارێ شەرمەزار” راگەھینیت.

ھەروھا 12 رێخستنێن جڤاکا سڤیل و مافێن مرۆڤان ژی دەربارێ بوویەرێ داخوازا پێکانینا کۆمیتەیەکا لێکۆلینێ یا سەربخوە و بێ لایەن کرن.

12 رێخستنێن جڤاکا سڤیل و مافێن مرۆڤان یێن ژ سووریێ و رۆژئاڤایێ کوردستانێ، د داخویانیەکێ دا ئاشکەرا کرن: “رێڤەبەریا خوەسەر ژ مرنا ئەمین عیسا ئەمین بەرپرسیارە، ژ بەر کو ئەو دەستھلاتدارە و بەرپرسیاریا سەلامەتیا خەلکێ، د ستوویێ وێ دایە.”

ئەو 12 رێخستن، داخوازا ئاڤاکرنا کۆمیتەیەکا سەربخوە و بێ لایەن دکەن کو نوونەرێن رێخستنێن مافێن مرۆڤان ژی د ناڤ دا ھەبن و ژ نوو ڤە لێکۆلینێ ل سەر تەرمێ ئەمین عیسا بکەن و ئەنجامان ژ بۆ رایا گشتی راگەھینن.

د ناڤا وان 12 رێخستنێن جڤاکا سڤیل و مافێن مرۆڤان دا، ناڤەندا دادێ یا مافێن مرۆڤان، دەستەیا یاسایی یا کورد، ناڤەندا بەلگەکرنا بنپێکرنان ل باکورێ سووریێ و سازیا ئێزدینا ژی ھەنە.