رەوشا پەکەکێ ل باشوورێ کوردستانێ دکەڤیتە پێڤاژۆیەکا نوو دا. دبیت گەلەک کەس ڤێ یەکێ نەبینن، لێ راستیا هەبوونا پەکەکێ و کۆمکرنا چەکدارێن پەکەکێ ل باشوورێ کوردستانێ د چارچۆڤەیا پرۆژەکێ دایە و دبیتە سەدەما ئالۆزیێن سیاسی و جڤاکی.
پەکەکێ ئەڤە دەمەکە بەرێ خوە دایە پەدەکێ و د مەدیا خوە دا شەرەکێ گەلەک دژوار کو ل سەر درەوان ھاتیە ئاڤاکرن ل دژی پەدەکێ ئەنجام ددەت. ھەروەھا ئێریشێ پێشمەرگەیان دکەن، بەری دەمەکێ ژی 6 پێشمەرگە شەھید کرن. لێ وەکو دهێتە زانین پەکەکە د چارچۆڤەیا پرۆژەیەکێ دا شەرێ پەدەکێ دکەت. حەتا رادەیەکێ ھندەک ئالیێن سیاسی ل باشوورێ کوردستانێ پشگریا پەکەکێ ل دژێ پەدەکێ دکەن.
لێ پەکەکە نە تەنێ ل سەر پەدەکێ، بەلکو ل سەر ھەموو دەستکەفتیێن باشوورێ کوردستانێ و ل سەر ھەموو لایەنان تەھدیدەکا مەزنە.
دێ د ناڤا ڤێ پێڤاژۆیێ دا یەنەکە و ئالیێن دی ژی ڤێ یەکێ تێگەھن، لێ دبیت ئەو دەم دەرەنگ بیت.
ئەندامێ سەرکرداتیا یەنەکێ مەحموود سەنگاوی د ھەڤپەیڤینەکا ل گەل کەنالێ NRT دا خویاکرن کو چەکدارێن پەکەکێ ل سنۆرێ د ناڤبەرا هەرێما کوردستانێ و ئیرانێ بوونە سەدەما ئێش و ژانان و قاچاخچیتیێ دکەن و ل زالگەهان ژی ناراوەستن.
سەنگاوێ دبێژیت: چەکدارێن پەکەکێ ھندەک جاران ئێریشی ھێزێن پاسدارێن ئیرانێ دکەن و بەھانەیان ددەنە دەست ئیرانێ ژ بۆی کو گەفا تۆپبارانا ناڤچەیێن سنۆرێ یێن ھەرێما کوردستانێ بکەت.
سەنگاوی ئاماژە ب وێ یەکێ ژی کر کو ناخوازن لگەل پەکەکێ بکەڤنە شەرێ براکوژیێ دا و گۆت: “مە گۆتیە پەکەکێ کو بچن ل جیھەکێ دی خەباتێ بکەن و داخوازا مافێن خوە بکەن.”
ئەڤ ئاخافتنێن مەحموود سەنگاوی د دەمەکێ دانە کو سەنگاوی د سەرکردایەتیا یەنەکێ دا وەکو پشتگرەکێ پەکەکێ دهێتە ناساندن.
