پشتی تاوانا شەھیدکرنا ئەمین عیسا د بن ئەشکەنجەیێ د زیندانێن هەسەدێ دا، چەکدارێن پەکەکێ ل 12ێ تیرمەھا 2021ێ، گەنجەکێ کورد ل کۆبانێ رەڤاند و ب شێوەیەکی ھۆڤانە ئەشکەنجە کر.
چالاکڤان ئووسب برکل ل سەر وەشانەکێ د تۆرێن جڤاکی دا راگھاند کو پسمامێ وی یێ ب ناڤێ محەمەد سلێمان ژ ئالیێ چەکدارێن پەکەکێ ڤە ھات رەڤاندن و ب توندترین شێوە ھات ئەشکەنجەکرن.
ناڤبووری دا زانین کو 4 ژ چەکدارێن پەکەکێ پسمامی وی رەڤاند و ب ھۆڤانە ل وی دان، ھەروەھا جھێن ھەستیار د لاشێ وی دا ب ئاڤا کەلی شەوتاندن، لەوما ژ بۆ نەخوەشخانەیێ ھات ڤەگوھستن و رەوشا وی یا تەندروستی خەرابە.
ڤی چالاکڤانێ تەکەز کر کو پسمامێ وی هیچ پەیوەندیەک ب پارتیەکێ و تەڤگەرا سیاسی ل رۆژئاڤا نینە، بەلکو ئەڤ کارە ب تەنێ وەکو تۆلھلدانەکێ یە ژ بەر کار و چالاکیێن وی، ژ بەر کو ئەو –چالاکڤان ئووسب- کریار و بنپێکرنێن پەکەکێ، پەیەدێ، هەسەدێ ریسوا و دیار دکەت.
