په‌كه‌كه‌ ژ كاره‌ساتا ب سه‌رێ لاهۆر هاتی عاجزه‌ و دلته‌نگه‌

په‌كه‌كه‌ ژ كاره‌ساتا ب سه‌رێ لاهۆر هاتی عاجزه‌ و دلته‌نگه‌

رێخستنا په‌كه‌كێ ژ ناكۆكیێن د ناڤا یه‌كێتییا نشتیمانییا كوردستانی دا چێبوونه‌ عاجزه و ئیرۆ د داخویانییه‌كێ دا ئێریشێن نه‌راسته‌ راست كرنه‌ سه‌ر كوڕێن جه‌لال تاله‌بانی قوباد و بافل.

كۆمیته‌یا په‌یوه‌ندیێن ده‌رڤه‌ یا رێخستنا په‌كه‌كێ، ئیرۆ رۆژا چارشه‌مبی 14/7/2021ێ، هه‌لوه‌ستا رێخستنێ ل ده‌ربارا ناكۆكیێن كو د نێڤبه‌را یه‌نه‌كێ دا‌ چێبوونه‌ راگهاند و د داخویانییه‌كا فه‌رمی دا نه‌رحه‌تییا خوه‌ ژ وان هه‌نگاڤان دیار كرییه‌ كو هه‌ر یێك ژ قوباد تاله‌بانی و بافل تاله‌بانی ژ رۆژا 8 تیرمه‌هێ ڤه‌ ل دژی لاهورێ جه‌نگی و باسكێ وی ئه‌نجام داینه‌.

د داخویانییا په‌كه‌كێ دا‌ هاتییه‌ كو پێویسته‌ ئه‌ڤ كریز ل گۆری مه‌كانیزا كۆنگره‌یا چاره‌مین یا یه‌نه‌كێ وه‌ره‌ن چاره‌سه‌ر كرن، ئه‌ڤ یێك ژی دهێته‌ واتایا كو ئه‌و ل دژی وان هه‌نگاڤانه‌ كو قوباد تاله‌بانی و بافل تاله‌بانی ل دژی لاهۆرێ جه‌نگی ئاڤێتنه‌.

په‌كه‌كه‌ دبێژیت: ژ به‌ر وێ براتییا جەلال تالەبانی، ئیبراهیم ئەحمەدی دگه‌ل عه‌بدوللا ئۆجالانی دا هه‌بوو، ئەرکا دکەڤیته‌ سەر مللێ مە ئەم دێ بجهـ بینن، ئه‌ڤ ژی ب وێ واتایێ تێ كو په‌كه‌كه‌ ژێر ب ژێر كه‌تییه‌ ناڤا هه‌ولێن پشتگریێ ل لاهور جه‌نگی.

هێژای گۆتنێ یه‌، ژ ده‌ما هه‌ڤسه‌رۆكاتییا لاهور جه‌نگی، په‌یوه‌ندیێن په‌كه‌كێ دگه‌ل یه‌نه‌كێ پڕ ب هێز كه‌تنه‌ و گه‌هشتن ئاسته‌كی وه‌ها كو كێم مابوو یه‌كێتی تام بكه‌ڤیته‌ ژێر باندۆرا په‌كه‌كێ، ئه‌ڤ ژی یه‌ك ژ سه‌ده‌مێن سه‌ره‌كی بوو كو هه‌نگاڤێن بێ باندۆر كرنا لاهور بهێنه‌ ئه‌نجام دان.

هه‌ر یه‌ك ژ قوباد تاله‌بانی و بافل تاله‌بانی گه‌هشتن وێ باوه‌رێ كو ئه‌و ئێدی رازی نابن لاهور جه‌نگی یه‌نه‌كێ بێخیته‌ ژێر باندۆرا په‌كه‌كێ و وان ب گۆتنا بابێ خوه‌ كر وه‌ختا كو ل سالێن نۆتێ ل پارلمه‌نا كوردستانێ گه‌لێ باشوورێ كوردستانێ ژ خه‌ته‌رییا رێخستنا په‌كه‌كێ هایدار كری، ل وێ ده‌مێ جه‌لال تاله‌بانی پیلانێن ژێر ب ژێر یێن په‌كه‌كێ ل دژی ستاتۆیا باشوورێ وه‌لات ئیفشا كربوون