ئاساییشا په‌یه‌دێ ل شەڤا رابووری 17ێ تیرمەها 2021ێ، 3 ئەندامێن پارتییا دەمۆکراتا کوردستانێ – سووریێ PDK-S و مەدیاکارەک ژ قامشلۆ و دەردۆرا دێرکێ رەڤاندن.
مالپەرا فەرمی یا PDK-S بەلاڤ کر، چەکدارێن په‌یه‌دێ ل شەڤا بووری ل باژارێ قامشلۆ دەستەیا ئەندامێ راوێژکاریێ یا PDK-S محەمەد دەهام ئەیۆ و ئەندامێ ئەنجوومەنا شاخێ PDK-S عزەدین مەلا رەڤاندن.
هەروها دیار کر، چەکدارێن په‌یه‌دێ ل شەڤا بووری ژی ئەندامێ ئەنجوومەنا هەرێمێ یا PDK-S محەمەد ئەحمەد سالح ل گوندێ ئابرێ یێ سەر ب ناڤچەیا چل ئاخا یا دێرکێ ڤە رەڤاندییه.
ل گۆری مالپەرا PDK-S، هەتا نها چ ئاگاهی و زانیاری ل سەر هەر سێ ئەندامێن وان یێن رەڤاندی نینه و تۆمەتێن ل سەر وان هاتنە سەپاندن نه‌دیارن.
ژ ئالییەکی دن ڤە ژی کەنالا ئارک تی ڤی راگه‌هاند، چەکدارێن په‌یه‌دێ ل شەڤا بووری پەیامنێرێ وان یێ ب ناڤێ بارزان حسێن ژ باژارۆکێ گرکێ لەگێ رەڤاند و چارەنڤیسا وی نەدیارە.
بەری 3 رۆژان ژی ئاساییشا په‌یه‌دێ ل دێرکا رۆژئاڤایێ کوردستانێ ئەندامەکی پارتییا دەمۆکراتا کوردستانێ – سووریێ PDK-S ب ناڤێ فەرامەز عەبدولکەریم حەجی عەبدێ رەڤاندبوو.
رەڤاندنا ڤان ئەندامێن PDK-S د دەمەکێ دا یە، ئەندامێ PDK-S ئەمین عیسا عەلی پشتی کو ژ ئالیێ ئاساییشا په‌یه‌دێ ڤە هاتبوو بن چاڤ کرن، تەرمێ وی رادەستی مالباتا وی هاتبوو کرن، PDK-S و مالباتا وی ژی دبێژن، ئەمین د بن ئەشکەنجەیەکا توند دا هاتبیە کوشتن.
