ئەنجوومەنا نشتمانییا کوردی ل سووریێ ئه‌نه‌كه‌سه، رەڤاندنا ئەندامێن پارتییا دەمۆکراتا کوردستانێ ژ ئالیێ چەکدارێن په‌یه‌دێ ڤە شەرمەزار کر و داخواز ژ سەرکرداتییا هه‌سه‌دێ و ئه‌مەریکا کر، دەستێوەردانێ بکه‌ن و ڤان گرتییان ئازاد بکه‌ن.
سەکرەتەرییا گشتی یا ئه‌نه‌كه‌سێ د داخویانیەکێ دا راگهاند، تەڤی بانگەوازییا ژ ئالیێ دۆست، جڤاک و رەوشەنبیران یا ژ بۆ سەرخستنا دانوستاندنان و گه‌هشتنا ب رێکەفتنەکا کوردی – کوردی، لێ بەروڤاژی وان بانگەوازییان و ل دژی پەرەنسیپێن مافێن مرۆڤان، دەزگەهێن ئەولەکاریێ یێن په‌یه‌دێ رۆژا 17ێ تیرمەهێ هەژمارەک ژ ئەندامێن په‌ده‌كه-س رەڤاندن.
سەکرەتەرییا ئه‌نه‌كه‌سێ دیار کر، محەمەد سالح ئەحمەد ل چلاخا، عزەدین مەحموود ل قامشلۆ، محەمەد ئەیۆ ل قامشلۆ، بارزان حسێن ل گرکێ لەگێ هاتنە رەڤاندن و ل کۆبانێ ژی ب سەر مالا سەرکردەیێ د پارتیا یەکیتییا کوردستانێ دا وەیسی شێخی دا هاتییە گرتن.
سەکرەتەرییا ئه‌نه‌كه‌سێ دبێژیت: گرتنا ڤان چالاکڤانان، سڤککرنا ب رایا گشتی و سەرکوتکرنا بیر و باوەریێن جودایە و ئارمانج ژ ڤان کریاران، هلوەشاندنا دانوستاندنێن کوردی – کوردی و گه‌هشتنا ب رێکەفتنا یەکرێزیێ یه د ڤێ قۆناخا نها یا هەستیار دا یە.
د داخویانیێ دا هاتییه: ئەنجوومەنا نشتمانییا کوردی ل سووریێ ڤان بنچاڤکرنان شەرمەزار دکەت و بانگ ل سەرکرداتییا هه‌سه‌دێ و ئه‌مەریکا وەک سەرپەرشتیارا دانوستاندنێن کوردی – کوردی دکەت، دەستێوەردانێ بکه‌ن و سینۆرەکێ بۆ ڤان بنپێکرنان دانن و ڤان گرتییان ئازاد بکه‌ن.
