دژەتەرۆرا کوردستانێ راگھاند، ھێزێن وان ل کامپا حەسەن شام یا ھەولێرێ کەسەک گرتیە کو پەیوەندیا وی ب تەقینا چەند رۆژ بەرێ یا دەڤەرا سەدر ل بەغدایێ ھەبوویە.
رێڤەبەریا دەزگەھێ دژەتەرۆرا کوردستانێ راگھاندیە، رۆژا 19ێ ڤێ مەھێ د تەقینەکا خوەکوژی دا ل ناڤ بازارێ دەڤەرا سەدر ل بەغدایێ ب دەھان کەس بوون قوربانی. وی دەمی دەزگەھێن ئەولەھیێ یێن ئیراقێ داخوازا هاریکاریی ژ حکوومەتا کوردستانێ کربوون بۆ گرتنا کەسێن کو دەستێ وان د وێ تەقینێ دا ھەبوویە. ژ بەر وێ ژی ناڤێ تۆھمەتبارەکێ دابوون حکوومەتێ کو پەیوەندیا وی ب تەقینێ ڤە ھەبوو.
دژەتەرۆرا کوردستانێ دایە زانین ژی، پشتی لێکۆلین و لێپرسینێن ھوور کەسێ کو ھاتبوو خواستن، ل ناڤ کامپا حەسەن شام یا کۆچبەرێن ئیراقی دا ھات گرتن. ئەو کەسێ کو ھاتیە گرتن، ناڤێ وی ھ.ی.ئ.ھ و خەلکێ باژارۆکێ حەویجە یێ سەر ب کەرکووکێ یە و دێ تەسلیمی حکوومەتا ئیراقێ هێتە کرن.
