زولما پەکەکێ/پەیەدێ ل رۆژئاڤایێ کوردستانێ بەردەوامە…

ئیبراھیم کوچلو

ل رۆژئاڤایێ کوردستانێ زولما پەکەکێ/پەیەدێ ب دژواری بەردەوام دکەت. کوردپەروەر تێنە رەڤاندن و ئێشکەنجە ل وان دهێتە کرن و تێنە کوشتن.

چەکدارێن پەیەدێ رۆژا 17ێ تیرمەھا 2021ێ، 3 ئەندامێن پارتیا دەمۆکراتا کوردستانێ – سووریا (پەدەکە-سێ) و کارمەندەکێ مەدیایێ ژ قامشلۆ و دەردۆرا دێرکێ رەڤاندن.

مالپەرا فەرمی یا پەدەکە-سێ ددەتە خویاکرن کو؛ “چەکدارێن پەیەدێ شەڤا بۆری ل باژارێ قامشلۆ دەستەیا ئەندامێ راوێژکاریێ یا پەدەکە-سێ محەمەد دەھام ئەیۆ و ئەندامێ ئەنجوومەنا شاخێ پەدەکە-سێ عزەدین مەلا رەڤاندن. چەکدارێن پەیەدێ شەڤا بۆری ژی ئەندامێ ئەنجوومەنا ھەرێمی یا پەدەکە-سێ محەمەد ئەحمەد سالح ل گوندێ ئابرێیێ سەر ب ناڤچەیا چل ئاخایا دێرکێ ڤە رەڤاند.”

ل گۆری مالپەرا پەدەکە-سێ، حەتا نھا هیچ ئاگاھی و زانیاریەک ل سەر ھەر سێ ئەندامێن وان یێن رەڤاندی بەردەست نینە و تۆمەتێن ل سەر وان ھاتنە سەپاندن نە دیارن.

ژ ئالیەکێ دی ڤە ژی کەنالێ ئارک تیڤی راگھاند، چەکدارێن پەیەدێ شەڤا بۆری پەیامنێرێ وان بارزان حوسێن ژ باژارۆکێ گرکێ لەگێ رەڤاند و چارەنڤیسا وی نە دیارە.

بەری 3 رۆژان ژی ئاسایشا ل دێرکا رۆژئاڤایێ کوردستانێ ئەندامەکێ پارتیا دەمۆکراتا کوردستانێ – سووریا (پەدەکە-سێ)یێ ب ناڤێ فەرامەرز عەبدولکەریم حەجی عەبدێ رەڤاندبوو.

رەڤاندنا ڤان ئەندامێن پەدەکە-سێ د دەمەکێ دایە، ئەندامێ پەدەکە-سێ ئەمین عیسا عەلی پشتی کو ژ ئالیێ ئاساییشا رۆژئاڤایێ کوردستانێ ڤە ھاتبوو بنچاڤکرن، تەرمێ وی رادەستی مالباتا وی ھاتبوو کرن. پەدەکە-سێ و مالباتا وی ژی دبێژن، ئەمین د بن ئەشکەنجەیەکا توند دا ھاتیە کوشتن.

ئەڤ کریار ب تەنێ خزمەتا دژمنێن گەلێ کورد دکەن

وەک من ل رێزێن ژۆر ژی دیار کری: ل رۆژئاڤایێ کوردستانێ چەکدارێن پەیەدێ جارەکا دی دەستپێکریە ئەندامێن پارتیا دەمۆکراتا کوردستانا سوریێ درەڤینن و د دەربارێ وان دا هیچ ئاگاھداریەکێ ژی نادەن. ژ بۆ ڤان بوویەران و رەڤاندنا ئەندامێن پەدەکەسێ نڤیسینگەھا سیاسی یا پارتیا دەمۆکراتا کوردستان – سووریێ رۆژا 18/7/2021ێ داخویانیەک ژ بۆ رایا گشتی راگھاند.

ل گەل بەردەوامیا شەرت و مەرجێن دژوار یێن ژیانا گەلێ مە، کریارێن زۆرداری و ترساندنا کۆمێن چەکدار یێن گرێدایی ھێزێن ئەولەھیێ یێن پارتیا پەیەدێ ژی بەردەوامن. شەڤا بۆری، دەستپێکرن و ھندەک کادرێن پارتیا مە رەڤاندن.

ھەروەھا پارتی د داخوویانیا خوە دا بەحسا کەسێن رەڤاندی دکەت و ناڤێ وان ئاشکەرا دکەت:

• محەمەد سالح ئەحمەد، ئەندامێ مەجلیسا مەنتقی یا پارتیا مە ل چلاخا

• عەزەدین عابدن مەحموود، ئەندامێ مەجلیسا مەنتقی یا پارتیا مە ل قامشلۆ-

• محەمەد دەھام ئایۆ، ئەندامێ دەستەیا شێورمەندیا پارتیا مە و سەرۆکێ بەرێ یێ ئەنجوومەنا ھەرێمی یا ئەنجوومەنا نیشتیمانی یا کورد ل قامشلۆ.

• بارزان حوسەین، ئەندامێ مەجلیسا مەنتقی یا پارتیا مە ل گرکێلەگێ

سێشەما بۆری، 13ێ تیرمەھێ، ھەڤال فەرامەز عەبدول کەرەم عەلی ژ دێرکێ، و د 22 گولان دا، ھەڤال عەبدولغەفار محەمەد ژ چلاخا ئاغا ھاتبوون رەڤاندن.

پەدەکەسە دبێژیت: ئەڤ کریارێن ترساندنێ و سیاسەتا بێدەنگکرنا خەلکێ ب تەنێ تێکچوونا رەڤەبەرییێ ددەتە نیشاندان.، ژ بەر کو ئەو ل ھەجەتەکێ دگەریت دا کو رایا دژبەر بشکێنیت و ب زۆرا چەکان رەوشا دیفاکتۆ فەرز بکەت.

پەدەکەسە د بەردەوامیا داخویانیا خوە دا دبێژیت کو؛ ئەم د پارتیا دەمۆکراتا کوردستان – سووریا دا د دەمەکێ دا کو ئەم ڤان کریارێن زۆردار و بنپێکرنێن مەزن، کو بەرەڤاژی رەگەزێن بنگەھین یێن ماف و ئازادیێن مرۆڤی نە و خزمەتا پێشەرۆژ و دۆزا گەلێ مە ناکەن، و ھەروەھا ھەولدانێن ژ بۆ سەرفرازیا یەکرێزیا کوردا سنۆردار دکەن.

ئەم بانگی دەزگەھێن ناڤنەتەوەیی دکەین کو ئەرکێن خوە پێک بینن دا کو رێگریێ ل بنپێکرنێن ل دژی کادرێن کۆنسەیێ بکەن، و ئەم بانگی گەلێ خوە، ھێزێن وان یێن نەتەوی، دەزگەھێن سڤیل و ھێزێن کوردستانی ژی دکەین کو خوەدی ھەلوەست بن . ئەم پشتراست دکەین کو ئەڤ کریار ب تەنێ خزمەتا دژمنێن گەلێ مە یێ کورد و ھەموو گەلێن ھەرێمێ دکەت.

ستەنبۆل، 23/7/2021