پەکەکێ ل باشوورێ کوردستانێ ئەڤ زارۆکە ژی رەڤاندن

پەکەکێ ل باشوورێ کوردستانێ ئەڤ زارۆکە ژی رەڤاندن

پەکەکە بەردەوامە ل سەر کارێن خوە یێن قرێژ ل کوردستانێ و هەر کو دچیت پتر زارۆکێن کورد بەر ب مرنێ دبەت، پەکەکە ب هەموو سازی و رێخستنێن خوە ڤە هەول ددەت مەژیکێ زارۆکێن کورد تەڤلیهەڤ بکەت و وان بکەتە قوربانیێن بەرژەوەندیێن خوە یێن حزبی.

هەموو سازی و رێخستنێن پەکەکێ وەکو سازیێن شووشتنا مەژیکێ زارۆکێن کوردان تەڤدگەرن، زارۆکێن کوردان ژ مالبات و باژار و گوندێن وان قوت دکەن و د ناڤا رەفێن خوە دا وەکو کۆلەیێن سەردەما رۆما ژ بۆی پێک ئانینا بەرژەوەندیێن خوە ددەتە کارپێکرن.

یەک ژ وان سازیێن پەکەکێ، سازیا جوانان یا کامپا مەخمووری یە کو ب “گەنجلیک” دهێتە ناسکرن، ڤێ سازیێ چەندین جوانێن کورد شاندینە ناڤا رەفێن پەکەکێ و ئەو ب خوە ل کامپا مەخموورێ رحەت رازاینە.

ل گۆر ئاگاهیێن تایبەت یێن پێگەها دارکا مازی، سازیا جوانان ل کامپا مەخموورێ کو ب گەنجلیک دهێتە ناسکرن و یا تایبەتە ب کار و چالاکیێن جوانان د ناڤا کامپێ دا بەرپرسیارا سەرەکییە ژ شاندنا جوانان بۆ ناڤا پەکەکێ، ئەڤ سازی ژ لایێ دەستەیەکێ کو ژ 4 کەسان پێک دهێت، دهێتە برێڤەبرن، ناڤێن دەستەکا برێڤەبەرا ڤێ سازیێ ئەڤەنە؛ «عەلی شیر، ئارگەش، تەکۆشین و رەوشەن»، بارەگەها ڤێ سازیێ دکەڤیتە ناڤا کامپا مەخموورێ دا.

چاڤکانیێن پێگەها دارکا مازی هەر وەها ئاشکەرا کرن کو د دەما رابۆری دا، پەکەکێ ب رێیا ڤێ سازیێ و سازی و ریخستنێن خوە یێن دی مەژیکێ گەلەک جوانێن کورد تەڤلی هەڤ کریە و ئەو ژ مالبات و وارێن وان قوت کرنە و رەڤاندینە ناڤا رێزێن خوە دا، دهێتە زانین کو پرانیا وان کەسان د بن ژییێ 18 سالیێ دانە و ئەڤ چەندە ژی ل دژی قانوونێن مافێن زارۆکانە ل جیهانێ.

هندەک ژ زارۆکێن ئیسال ژ لایێ پەکەکێ ڤە هاتینە خاپاندن ئەڤەنە:

  • کچا ب ناڤێ دیدار محەمەد سەعید، ژ داییک بوویا سالا 2007ێ، ئەڤ کچە قۆتابی بوویە و نیشتەجیا تاخێ داڵان یێ باژارۆکێ خورمال یێ سەر ب هەلەبچەیێ بوویە. ئەو ل شەڤا 16-17/4/2021ێ بەرزە بوویە و پشترا خوەیا بوویە کو تەڤلی ریزێن رێخستنێن پەکەکێ د ناڤا سلێمانیێ دا بوویە، ژ لایێ مالباتا وێ ڤە هاتیە ڤەگەراندن بۆ مالا خوە.

  • ئامەد عەبدوللا، تەمەن 18 سال، ژ گوندێ هیلال یێ سەر ب باژارۆکێ ئولودەر ل پاریزگەها شەرنەخێ یە، ئەو ل رۆژا 4/5/2021ێ ژ لایێ سازیا جوانان یا کامپا مەخموورێ بێیی رازیبوون و هایداریا مالباتا وی هاتیە شاندن ژ بۆی چیا، ل سەر ڤێ یەکێ مالباتا ئامەد رایەدارێن پەکەکێ هایدار کرنە گەر زارۆکێ وان نەڤەگەرینن ئەو دێ کامپا مەخموورێ ب جی هێلن و چن جیەکێ دی کو نە د بن دەستهلاتا پەکەکێ دا بیت. هەیا نها مالباتا ئامەد نزانن کورێ وان ژ بۆ کودەرێ هاتیە شاندن و هیچ پەیوەندیەک د ناڤبەرا وان دا نەمایە، ژ لایێ خوەڤە پەکەکێ مالباتا ئامەد هایدار کرنە کو ئەو ب کەیفا دلێ خوە تەڤلی رێزێن پەکەکێ بوویە و سۆز ب پەکەکێ دایە د ناڤا پەکەکێ دا خەباتێ بکەت.

  • محەمەد سیروان کەمال، نیشتەجیێ تاخێ راپەرین ل باژارۆکێ چەمچەمال، ل رۆژا 12/1/2021ێ ژ مالا خوە دەرکەتیە، پشتی لێکۆلینا مالباتا وی دیار دبیت کو ئەو ژ لایێ ریخستنێن نهێنی یێن پەکەکێ هاتیە شاندن بۆ قەندیلێ، هەموو ئەندامێن مالباتا وی ئەندامێن پەدەکێ نە، ل گۆر زانیاریێن پێگەها دارکا مازی ژ لایێ بەرپرسەکی یەنەکێ ب مەرەما رادەستکرنا ناڤبووری ب مالباتا وی پەیوەندی ب بەرپرسەکی پەکەکێ ب ناڤێ “هەڤال رۆستەم” هاتیە کرن، لێ بەلێ داخوازا وان هاتیە رەدکرن.

  • جوانرۆ محەمەد زیاد، تەمەن 17 سال، خەلکێ گوندێ شێخ وەیسی، بابێ وی کادرێ یەنەکێ یە، ل رۆژا 21/1/2021ێ، ژ لایێ کەسەکێ ب ناڤێ “هەڤال خاڵی” کو فەرماندارەکێ پەکەکێ یە ل سنۆرێ باژارۆکێ ئاخچەلەر و بارەگەها وان ل ناڤچەیا چنارتوو یە، هاتیە شاندن ژ بۆ دەورەیا پەروەردەیێ ل قەندیلێ.

رەڤاندن و خاپاندنا زارۆکێن کورد ژ لایێ پەکەکێ ڤە نە تشتەک نوو یە، پەکەکە ژ دەما هاتیە دامەزراندن هەیا نها بەردەوام یان زارۆکێن کورد دخاپینیت و وان تەڤلی رەفێن خوە دکەت، یانژی ب دارێ زۆرێ وان د ناڤا گوند و باژارێن کوردستانێ دا درەڤینیت و ل چیایێن کوردستانێ ب دەستێ ترکیێ ددەتە کوشتن.