سەرۆکێ پارتیا ئازاد یا کوردستانێ (پاک) موستەفا ئۆزچەلیک دەربارێ ئێریشا کو ل ھەمبەر مالباتەکا کوردا ل باژارێ کۆنیا یا ترکیا پێکھاتی دا داخویانیەکا نڤیسکی بەلاڤ کر.
داخویانیا نڤیسکی یا موستەفا ئۆزچەلیک وەھایە:
ئێریشا ل کۆنیایێ ئێریشەکا نیژادپەرەستی و پلانکرییە ،ئەم سەرێ خوە ل بەر بکوژان و ل بەر یێن ل پشت وان ناچەمینین.
ل ناڤچەیا مەراما سەر ب پارێزگەھا باژارێ کۆنیا یا ترکیا دا رۆژا 30/7/2021ێ گرۆپەکا نیژادپەرەستێن ترک ب ئاوایەکێ پلانکری ئێریشەکا چەکداری کرە سەر مالباتەکا کورد و د ئەنجامێ دا ژ ڤێ مالباتا کورد 7 کەس ھاتن کوشتن و مالا وان ھاتە شەوتاندن.
بەرپرسێ ڤێ ئێریشێ یێ ئەساسی دەولەتا ترکیایێ یە کو چاڤێن خوە ل سەر ئێریشکەران دگریت، و ب سییاسەتا خوە یا ل دژی کوردان جەسارەتێ ددەتە ئێریشکەران، رێکێ ژ بۆی ڤان ئێریشان خوەش دکەت.
ملەتێ کورد ل ھمبەری ڤان ئێریشان سەرێ خوە ناچەمینیت.
دڤێت ھەموو پێکھاتەیێن گەلێ مە، تفاق و یەکگرتنەکا بەرفرەھ یا نەتەوەیی، نیشتیمانی ڤەهینن.
ئەم ڤێ ئێریشا نیژادپەرەستا پلانکری روورەش دکەین.
ئەم سەرساخییێ ژ مالباتا دەدەئۆگوڵار و ژ ھەموو گەلێ مە دخوازین.
موستافا ئۆزچەلک
سەرۆکێ گشتییێ پاکێ
