پشتی ئیریشێن بەردەوام یێن رێخستنا پەکەکێ ل سەر پێشمەرگەیێن کوردستانێ و شەهیدکرنا 9 پێشمەرگەیان و بریندارکرنا دەهان پێشمەرگەیێن دی و ئامادەکاریێن بەردەوام ژ بۆ ئێریشەکا بەرفرەهتر، نها هەسەدە ژی گەفا ئێریشا ل سەر پێشمەرگەیێن حکوومەتا هەرێما کوردستانێ دکەت.
چاڤکانیێن پێگەها دارکا مازی ئاشکەرا کرن، پەکەکە مژوولی خوەئامادەکرنێ یە کو د مەها تەباخێ دا ئێریشێ بکەتە سەر پێشمەرگەیێن کوردستانێ. ژ بۆی ڤێ یەکێ ژی ئامادەکاریێن خوە دکەت و دخوازیت رایا گشتی ژی ب درەوێن خوە یێن د مەدیایێ دا بخاپینیت و ووسا نیشان بدەت کو ئەڤە شەرێ ل دژی پەدەکێ یە و پەدەکە ب خوە بەرپرسیارە ژ ڤی شەری، لێ د ئەساس دا پەکەکە د بن ناڤێ پەدەکێ دا دخوازیت شەرێ ل دژی پێسمەرگە و حکوومەتا هەرێما کوردستانێ بکە.
د ڤێ دەربارێ دا هێزێن سەر ب پەکەکێ ل رۆژئاڤایێ کوردستانێ کو ب هەسەدە تێن ناسکرن پشتەڤانیا خوە ژ بۆی پەکەکێ و ئێریشا ل سەر پێشمەرگەیێن کوردستانێ راگهاند.
یەک ژ فەرماندارێن هەسەدێ ب ناڤێ «مەحموود بەرخوەدان» د دیدارەکا چاپەمەنیێ دا ل گەل ئاژانسا (ANHA) یا سەر ب پەکەکێ ڤە تەکەز ل سەر ڤێ یەکێ کر کو گەر شەر دروست ببیت ئەو بێ لایەن نامینن و دێ پشتەڤانیا پەکەکێ کەن.
مەحموود بەرخوەدان راگهاند، “ئەم ناخوازین شەرێ پێسمەرگە و گەریلا دروست ببیت، لێ گەر شەر چێبوو بێ گومان قەسەدە بێ لایەن ناسەکنیت و دێ هاریکاریا پەکەکێ کەت”، ئەڤ ئاخافتنێن فەرماندارێ هەسەدێ د دەمکیدانە کو هەسەدێ پێش نها چەندین جارا راگهاندیە کو ئەو هێزەکا سەربخوە نە و هیچ پەیوەندیەک ب پەکەکێ ڤە نینە.
دهێتە زانین کو ئەڤە جارا یەکێ نیە کو هەسەدە گەفان ل حکوومەتا هەرێما کوردستانێ دکەت، پێش نها ژی چەندین جاران د بن ناڤێ دژاتیکرنا پەدەکێ دا، گەف ل حکوومەتا باشوورێ کوردستانێ کرنە، ل داوی جار «ئالدار خەلیل» ژی ئەڤ یەک راگهاندبوو کو گەر د ناڤبەرا پێشمەرگە و گەریلایێن رێخستنا پەکەکێ دا شەر دەرکەڤیت، ئەم وەکو رێڤەبەریا خوەسەر بێ لایەن نامینین و دێ ل دژی پەدەکێ “حکوومەتا هەرێما کوردستانێ” شەری کەین.
